Pynrem jur u CM halor ka jingjia shah thombor kawei ka kynthei ha WGH

Syllad | The Rising MeghalayaJune 29, 2024

U Myntri Rangbah ka Jylla u Conrad K Sangma u la pynrem jur ha kaba iadei bad ka jingjia shah thombor ba dang shen jong kawei ka kynthei ha ka kynhun ki shynrang briew kaba la jia hapoh West Garo Hills bad pynthikna ban shim ia ka jingpynshitom pyrshah ia kito ki briew kiba donkti.

Haba kren sha ki lad pathai khubor ha ka 28 tarik Jylliew, u CM u la ong “Ngi pynrem jur ia kiba kum kine ki jingleh jingkam bymman bad ia ki briew kiba donkti. Ngin shim ia ki sienjam kiba tyngeh ban pynshitom ia kine ki briew katkum ka ain.”

“Kaei kaba ki leh ka long kaba bakla shibun. Lada ka don kano kano ka jingsngewkhia ki la dei ban iaid katkum ka lynti jong ka ain ym ban shim ia ka ain ha la ka jong ka kti,” u la ong da kaba bynrap ruh ba kane ka long kaba bakla shibun, bad kumta ruh ngin hap ban shim ia ki sienjam ban pynshitom pyrshah ia kito ki briew kiba donkti,” u la ong.

Haduh mynta ki la don san ngut ki briew kiba la shah kem halor ka jingdonkti ha kane ka kam thombor pyrshah ia kane ka kynthei.

Katkum ka video kaba la saphriang ha ki social media la iohi ba kane ka kynthei ka la shah bom shah tied ha ka kynhun jong ki katto katne ngut ki shynrang briew kiba la bom bad tied tyngeh da ki siej wat hadien ba ka la iam lyniar ba kyntu ba kin sangeh.