Pynrem jur u CM ia ki dur ‘The Last Supper’ kaba ktah ia ki Khristan ha ka jingplie ia ka Paris Olympic

Syllad | The Rising MeghalayaJuly 29, 2024

U Myntri Rangbah ka Jylla u Conrad K Sangma u la pynrem jur ha kaba iadei bad ka bynta jong ka jingplie ia ka Paris Olympic 2024 kaba la pyni ia ki dur kiba  pyniasyriem na ka jingkhawai ba khatduh (The Last Supper) kaba dei ka jingdro ba la ringdur da u Leonardo da Vinci.

“Nga sngewkhia bad sngewsih jur halor kane ka jingleh kaba pyniasyriem ia ka “Last Super” ha ka jingplie ia ka Paris Olympics. Dei ban burom ia ka jingsngew jong ki paid riewngeit Khristan. Nga pynrem jur ia kaba kum kane ka jingleh,” pynpaw u Myntri Rangbah lyngba ka rynsan social media.

Kane ka jingiashim bynta kaba la wanrah ka jingkynthoh kaba jur khamtam na ka Balang Catholic bad kiwei pat ki Balang Khristan ha ka pyrthei ka pyni ia ki 18 ngut ki nongiashim bynta kaba kynthup ia ka kynthei kaba sngaid kaba phong da ka jingdeng khlieh (kata kaba bujli ha ka jaka jong ka dur U Jisu ha ka jingiabam kaba khatduh ha ryngkat bad ki synran hashwa ba un sa shah sah narphna.

Kumjuh la pyni ruh ia ka dur jong ka Syiem kaba la shah paring bad ka dur jong u briew uba ai rong blue uba shong halor ka miej ia kaba la kynnoh ruh ba ka dei ka jingleh ibein bad kren bein ia ki paid Khristan.

Katba na ka liang ki nongpyniaid jong ka Olympic (IOC) kiba hynne ka sngi U Blei ki la pan map na ka Balang Catholic bad ki Balang Khristan halor kane ka bynta ki la pynksan da kaba ong ba kane ka thmu ban pynpaw halor ki kam shah lehbor bad ki kam thombor hapdeng ki para bynriew.

Deeply disappointed by the drag act depicting the Last Supper at the Paris Olympics. Religious sentiments must be respected. Strongly Condemn such act.

— Conrad K Sangma (@SangmaConrad) July 28, 2024