Pynrem ka Balang Katholik Jowai Diocese ia ki ba pynthohbria ia ka balang ha ki Social Media

Syllad | The Rising MeghalayaMarch 4, 2021

Ka Balang Katholik Jowai Diocese ka pynrem jur ïa kino kino ki riew shim kabu kiba pynthohbria ïa ka jingngeit bad jingsngew jong ka Balang Katholik lyngba ka Social Media kaba la paw ha kaba ka dur U Jisu, bad ka Maria, bad ka dur ki lyngdoh ki riewniam jong ka Balang la pyndonkam ha ka rukom ka ba khlemakor bad kaba ktah ïaka jingngeit bad ka jingsngew jong ki Khun ka Balang Katholik ha baroh ka Jowai Diocese.

U President Indian Catholic Youth Movement (ICYM), Jowai Diocese, u Mutshwa Thabah ula ong ba “Ha kine ki sngi kiba la dep ngi ïohi ha ki social media ba don bun ki dur bad ki video kum ha ka facebook, whatsapp bad kiwei kiwei dei ki lad pathai khubor kiba ktah ïa ka jingsngew jong ki khun ka Balang Katholik haba ïohi ïa kum kine ki dur pynjahburom ba la pynsaphriang ha ki khubor paidbah. Na ka liang ka Synjuk Ki Seng Rangbah Katholik Jowai Diocese, Synjuk Seng Kynthai Katholik Jowai Diocese, Ka ICYM Jowai Diocese bad ka Catholic Association Jowai Diocese ngi pynrem jur ïa kum kine ki  jingle ba jingpynthohbria ïa ka Balang.”

“Kum ka Balang hi baroh kawei ngi pynrem jur ïa kum kine ki jingpynthohbria bad lada ki dang ïai jia kumne shi kumne ngi kum ka Balang Katholik ngin hap ban shim da ka lynti kaba kham tyngeh ban teh lakam ïa kum kine ki riew shim kabu.  Kumta, la kyrpad jur ïa kino kino ki briew kiba don kano kano ka jingsngewthuh bakla shaphang ka jingngeit Khristan Katholik, ngi kloi ban don ka jingïakren ka jingïapynshai khlem da pynthohbria hynrei da ka ba burom markylliang  ïa ka jingsngew bad jingngeit jong kiwei pat,” la ong u president ICYM.