Pynrem ka KAM Meghalaya & ka TUR iaka jingjia siat iap iaki 5 ngut ha Mukroh

Syllad | The Rising MeghalayaNovember 23, 2022

Ka KAM Meghalaya bad ka TUR ki pynrem jur ia ka jingleh palat pud bad be aiñ jong ki Pulit Assam kiba la siat iap khlem jingiatiplem pyrshah ia ki nongshong shnong ba lui lui jong ka Shnong Mukroh kaba don ha khappud bad ka Assam ha ki thaiñ Jaiñtia Hills.
Nyngkong eh ki nongshong shnong jong ka Shnong Mukroh ki la shah kem katba ki dang lum dang lang ia ki jingmih kiba don bad mih hapoh khlaw kaba dei ka hok bad ka nongkynti jong ki ba ki la ioh pateng la pateng.

Hadien ba don kiba la shah kem ki nongshong shnong ka Mukroh ki la mih paidbah ban leit sha thanat bad dawa na ki bor pulit ban pynlait noh ia kiba shah kem . Dei ha kane ka por ba ki Pulit Assam ki la siat pathar bad siat iap ia ki paidbah nongshong Shnong kiba lui lui.
Ki Nongshong Shnong jong ka Shnong Mukroh bad kiwei de ki Shnong ki don ia ka hok bad ka dei ka nongkynti jong ki ban lum bad bam na ki jingmih kiba don bad mih ha khlaw. Ia kane ka hok ki la pyndonkam pateng la pateng da ki phew spah snem shuwa ban don kita ki mawpud hapdeng ki Ri ne Jylla. Ka khyndew bad ki khlaw ki dei jong ki Shnong bad ki nongshong Shnong, ym dei jong ka Ri India ne Jylla Assam. Hynrei da ki bun phew tylli ki snem ki Pulit Assam ki leh don bor bad pyndik ia ki briew ha ki Shnong khappud.

Haduh mynta baroh ar ki Sorkar jong ka Assam bad Meghalaya kim pat lah ban pynbeit ia ki kam khajia Khappud. Hynrei wat lada la pynbeit ne dro ia u pud u sam ruh, ka Sorkar Assam lane Sorkar India ne kino kino ki bor kim lah pat bad kim don hok satia ban knieh ia ka hok bad nongkynti jong ki nongshong Shnong ban lum ban lang bad bam na ki jingmih kiba don bad mih ha khlaw.

Ka dei ka hok jong ki trai muluk ban bam na ki jingmih kiba don ha khlaw bad ka Aiñ Forest Rights Act ka ai ka jingiada ia kane ka hok.

Ka KAM bad TUR ki dawa kumne harum:

1. Ban kem mar dor bad pynshitom ia kito kiba siat iap ia ki briew.
2. Ban siew bai lutsan bad bai sumar ia kiba mynsaw.
3. Ba ia ki hok jong ki nongshong Shnong halor ki jingmih kiba don ha khlaw bad ki hok tynrai jong ki ban im ryngkat bad ki khlaw ki btap dei ban pynskhem da ki Aiñ.
4. Ba ka jingiapynbeit pud hapdeng Assam bad Meghalaya dei ban pynbeit halor ka nongrim ba ka hok tynrai jong ki nongshong Shnong halor ki khlaw bad ki jingmih ba don ha khlaw dei ban pynneh bad iada ia ki.
5. Ba ki Sorkar Assam bad Meghalaya kim dei shuh ban pynslem ne pyntud ia ki kam pynbeit pud.