Pynrem ka KSU iaki BSF ba thombor iaka longiing ha khappud Indo-Bangla

Syllad | The Rising MeghalayaJune 25, 2024

Ka Khasi Students’ Union( KSU) East Jaintia Hills District Unit, kala ujor sha ka bor district jong ka East Jaintia Hills halor ka jingthombor ki BSF ia kawei ka longiing ha khappud India Bangladesh.

Kane ka jingjia kala jia haka miet 19- 20 tarik Jylliew ha kawei na ki shnong kaba hap ha Umkiang Police Patrolling Post kaba hap ha Lumshnong Police Station, ha kaba la kynnoh ba ki shipai BSF ki la phrung jubor ha kawei ka longiing bad shoh bom ia u kpa ka iing bad ktah kti iaka khun. Halor kane ka jingjia kala don ruh ka jingujor ejahar hakhmat ki pulit, hynrei ym pat iohkem satia iano iano.

Ka KSU haka jingujor kaba la ai sha Deputy Commissioner, East Jaintia Hills District, kala dawa ban pynshitom katkum ki kyndon jong ka aiñ iaki BSF kiba donkti ha kane ka kam.

Ka KSU kala leit jngoh ruh ia u longkpa, uba shah sumar ha Civil Hospital ha Khliehriat, uba shitom jur na ka krung.

Kane ka jingleh donbor kine ki BSF kam dei shuh ka sien ba nyngkong hynrei kaba la jia bun bun sien. Ki paid nongshong shnong ka Sonapyrdi, Huroi Umkiang ki la ujor bunsien sha kiba dei khmih naduh ki SP, DC, hynrei kine ki khlem leh eiei ka shu kut khlem seisoh.

Ka KSU kala rai ruh ban leit ujor sha ka DGP ka jylla ban leh eiei ban pynkynriah ia kine ki BSF kiba ha Sonapyrdi bad kito kiba don ha NH-6 ha khappud jong ka shnong Dona Umbluh bad Ratachera namar ka jingdon jong ki ha kito ki jaka kim lah satia ban teh lakam ia ka jingwan rung tuh ki khar Bangladeshi sha ka jylla. Halor kane ka jingdawa pynkynriah iaki shipai BSF, ka KSU kala dep dawa ruh na u Myntri ka tnad kam pohiing bad Deputy CM.