Pynrem ka RJTA iaka hukum khang iew syndet ha Jowai

Syllad | The Rising MeghalayaAugust 2, 2021

Ka Riloom Jaintia Traders Association (RJTA) kala pynpaw ka jingbynñiaw kaba khraw halor ka hukum khang iew syndet syndet jong u District Magistrate, West Jaintia Hills ha sor Jowai haka sngi Nyngkong.

U President jong ka RJTA u Paila Kordor Lyngkot ula ong ba ka jingkhang syndet syndet kala wanrah iaka jingklumar ia ki paid nongkhaii kiba die ia ki mar bapher bapher namar ba kadei ka sngi nyngkong jong ka taiew ba ki nongkhaii kila wanrah iaki mar ban die iaki mar baroh shitaiew ha ki iew ki hat.

“Lada ngim ioh ban die iaki mar hapoh kane ka taiew, kine ki mar kiba kynthup iaki jhur ki jhep, ki soh ki pai bad kiwei kiwei ki mar kin pyut lut bad kan wanrah iaka jingduh nong iaki nongkhaii,” la ong Paila.

U Paila ula ong “Kane ka hukum kaba la pynmih kynsan kynsan ban khang ia ki iew kan ktah jur ia ki nongkhaii ba rit ba ria ban pyndap iaki jingdonkam ha ki iing ki sem jong ki bad ngi pynrem jur ia u District Magistrate halor kane ka hukum khang iew.”

Ula ong ruh ba naka liang ka RJTA kala pyrshang ban pynsngewthuh iaki nongkhaii bad ki nongdie jingdie ha iew ha hat ban ai tika bad kumba 60 percent kila dep ban ai tika ban iada na ka jingpang khlam COVID, pynban ka jingkhmih lynti jong ki ban ioh shongdie kumba ju long kala long mar khongpong hadien bala mih kane ka hukum khang iew.

Ka RJTA kala rai ban iakynduh ia u District Magistrate ba un pynjynsur ia ka hukum khang iew khnang ba ki nongkhaii kin nym iap thngan.

U District Magistrate, West Jaintia Hills District Garod LSN Dykes haka sngi Nyngkong ula pynmih iaka hukum ban khang biang iaki iew ha Jowai hadien bala kiew ka jingiabit jingpang khlam COVID-19 kaba la kynjoh haduh 15 percent ka jingshah ktah (positivity rate) jong ki nongshong shnong na une u jingpang khlam nalor ba kiew ka jingiap na ka khlam.

Katkum ka report ka tnad ka koit ka khiah, ki briew kiba dang shitom na ka jingpang khlam ki don haduh 659. Kiba iabit thymmai ki don 33 ngut bad ka iap hapoh ka district kala kot sha ka 101 ngut.

Kumta kum shibynta ban pyntreikam ïaka kyndon jingpynjari ne ka containment measures, u District Magistrate ula pynkylla iaka hukum kaba la pynmih ha u Naitung 31 tarik bad hukum ban khang iaka iew Iawmusiang, Iaw Chyiap (JPC Market), Iaw Chor (CNI Market), Iawthymme, Ladthadlaboh bad ka iew Seinraij naduh mynta ka shiteng synia 2 Nailar (August) tad haduh bala pynbna da kumwei.