Pynrem ka Seinraij Jowai iaki ar ngut kiba pynmong iaka jingsngew ki khun ka Niamtre

Syllad | The Rising MeghalayaApril 1, 2025

Ka Seinraij Jowai ka la pynrem jur ia ki jingkren ki arngut kiba ka seng ka la lap ba ki long kiba pynjah burom ia ka jingngeit tynrai jong ka jaidbynriew Pnar.

Haba pynrem ia kane, u general Secretary Seinraij Jowai Arwotki Sumer ula ong ba ka jingkren kine ki ar ngut ha kawei na ki talk show ka pynmong iaki khun ka Niamtre khamtam ha kaba iadei bad ka Chada Sukra bad ka Behdienkhlam katkum ka jinghikai u barim.

Ka jingkren ka jong ki kum ka seng bad ka niam kim lah ban pdiang bad haba ngi Chad Sukra ka dei ka sngi ban burom iaka mei ramew bad kam mut ba ngi pyndep iaka Chad Sukra kam mut ba ka mei mariang ka don tang ha ka thain ka jong ngi, la ong u Arwotki bad bynrap ba 70 percent ki nongshong shnong ki im da kaba rep kaba riang bad ioh iaka bam ka dih.

U Assistant Secretary Seinraij Jowai Wyraiki Kharbuki ula pynkymaw kumno ka Seinraij ka pynkhie im iaka Chad Sukra bad Behdienkhlam ka dei ka jinglehniam ban pynkhraw bad burom iaka bei ramaw shuwa u hiar sha ki hali ki pynthor. Ka jingpyndep ka Chad Sukra kadei ban pynkhraw iaka kolshor bad ban kyntiew iaka jinglong tynrai ka jaidbynriew.