Pynrem ka seng Kur Lamare iaka jingjia shah pyniap ha Barato

Syllad | The Rising MeghalayaApril 5, 2024

Ka seng Kur Lamare Jaintia Pyllun (KLJP) ka dap da ka jingsngewsih bad jingsngew khia kaba jur halor ka jingshah pynīap dusmon U Rinal Lamare (64 snem) uba na ka shnong Barato, West Jaiñtia Hills ha ka 3 tarik mynta u bnai. Ka seng ka pynrem jur ia kum kine ki riew thrang snam ki bym salia ban shim jyndat ia ka jingim balui lui jong ki mynsiem ba kordor.

Halor kane ka jingshah pyniap dusmon, Ka Kur Lamare Jaintia Pyllun ka kyrpad jur ïa ki bor jong ka aiñ lyngba ka tnad pulit ba kan shimkhia ïa kane ka kam bad ban kem mardor ïa ki runar kiba donkti ha kane ka kam pynïap briew bad ban pynshitom ruh ia ki katkum ki bor jong ka aiñ.

Ka seng ka phah ruh ïa ka khubor jingsngewlem sha ki ba ha īing ha sem jong U (L) Rinal Lamare bad kyrpad ia U Blei Trai Kynrad Nongbuh Nongthaw ba un kyrkhu kyrdoh ïa ka īing ka sem jong ki.