Pynrem ka SPC bad MEPA ba kynthoh mynder ka VPP ia u nongthoh khubor ba la rim ka Jylla

Syllad | The Rising MeghalayaFebruary 5, 2025

Ka Shillong Press Club (SPC) bad ka Meghalaya Editors’ & Publishers Association (MEPA) ha ka jingiakynduh kaba la long hynne ka sngi 4 tarik Rymphang ki la rai ban pynrem jur ia ka jingpynphriang ia ka jingthoh lyngba ka rynsan social media da ka VPP Youth Wing kaba la khot pynlong da ka rally ar shaka ha ka 6 tarik Rymphang ban pyrshah ia uwei na ki nongsoi kyrteng ha ka shithi ba dawa pan mab ia u President ka VPP u Bah Ardent Basaiawmoit halor ka jingkynnoh khlem nongrim pyrshah ia ki artylli ki lad pathai khubor, kata ka Batesi TV bad T7.

Lyngba u kyrwoh ba la pyllait da ka SPC bad MEPA ki la ong ba u nongsoi jong katei ka shithi na ka liang ka MEPA u dei u Rajib Choudhury uba dei u dkhot ba la slem bha ha ka kam thoh khubor bad uba la trei ha Meghalaya mynta lah palat laiphew tylli ki snem, kumta ym lah ban khein ia u, u mynder ne foreigner.

“Nalor kata, baroh ki lad pathai khubor ha Meghalaya ki long kiba iatylli bad kim ju don ia kino kino ki kam ba kan don ka jingsngew iapher jaidbynriew ne bein jaidbynriew hynrei ki iengskhem bad iatylli lang kum ka kynhun na ka bynta ban shakri kum u paia ba saw jong ka synshar paidbah ha ryngkat ka jingaiti lut katba kaba ki lah ba kin leh,” ki la ong.

Kumta ki la ong ba kane ka dei tang ka jingkren bein jaidbynriew ban khot ia u dkhot ba la rangbah jong ka kynhun nongthoh khubor uba la ioh jingithuh na ka Tnad Directorate of Information and Public Relations ka Jylla kum u mynder haba u dei u nongshong shnong jong ka ri India kum kiwei pat, lait noh satang lada ka VPP ka shim ia ki nongshong shnong ka India kiba shong ba sah ha Meghalaya kum ki mynder.

Shuh shuh ki la ong ba ka SPC bad ka MEPA ki dei ki kynhun jong ki nongthoh bad nongpathai khubor ka jylla kiba kynthup ia ki Khasi, Jaintia, Garo bad kiwei kiwei ki jaidbynriew nong India kiba trei ia ka kam ban pynsaphriang ia ki khubor sha ki paidbah ka jylla bad ka ri hi baroh kawei.