Pynrem ka Synjuk Waheh Shnong EJH halor ka jingshah kren khlem akor u DC ka district

Syllad | The Rising MeghalayaAugust 30, 2023

Ka Synjuk ki Waheh Shnong ka East Jaintia Hills District ka pynpaw ka jingsngew kyndit bad sngnew bynniaw jur ban iohi lyngba ki lad pathai khubor halor ka jingshah tim shah tla bad ka jingshah kren khlem akor jong u Deputy Commissioner ka district ha ki katto katne ki briew kaba la jia ha ka sngi ba Ar ba la lah ha ka lynti surok National Highway 6 hajan ka shnong Wahiajer.

Kane ka la wan long hadien ba ka Synuk hapoh ka jingialam jong u president u Ma H Nongtdu ryngkat ka jingiadonlang I Dr. P Nongtdu bad katto katne ngut ki riew pawkhmat jong ka thain mynta ka sngi Balang ki la leit ban iakynduh ia u Abhilash Baranwal IAS, Deputy Commissioner ka East Jaintia Hills District, Khliehriat ban pan ka jingpynshai halor katei ka jingjia kumba la sakhi lyngba ki lad pathai khubor.

Hadien ka jingpynshai na ka liang u DC, na ka liang ki  nongialam jong ka Synjuk ki Rangbah shnong bad ki rangbah ba pawkhmat jong ka thain ki la pynpaw ka jingsngewdiaw halor kane ka jingshah kren kynthoh jong u DC da ki kyntien khlemakor kaba pyni ia ka jingbym burom shuh ia ki riewrangbah khamtam ia u khliehduh jong ka district.

Kumta na ka liang ka Synjuk ka pynrem ia kane ka jingjia khlem da thew ia ki jingduna jongno jongno bad ka kyntu ruh ba nangne shakhmat kiba kum kine ki jingjia kim dei ban wan jia shuh.

Ha kajuh ka por ka Synjuk ka kyrpad ruh ia ki para nongshong shnong jong ka district ban wan sha ka jingiasngewthuh jingmut ia kaei kaei kaba la jia bad ban klet ia katei ka jingjia khnang ban wanrah ia ka roi ka par bad burom jong ka district.