Pynrem u CM halor ka jingjia shah pyniap ha Mawlai, kular ban pynioh ia ka jingbishar hok ia baroh

Syllad | The Rising MeghalayaApril 11, 2024

U Myntri Rangbah ka Jylla u Conrad K Sangma ha ka 11 tarik mynta u bnai u la ong ba ki bor pulit ki la shim ia ki sienjam ban pynlong ka jingthwet ia ki runar kiba donkti ha kaba iadei bad ka jingjia kam thombor kaba la lam sha ka jingiap jong uwei u nongtrei bylla sngi ha ka thain Mawlai Mawroh kaba la jia ha ka sngi Balang ba la lah.

Haba kren sha ki lad pathai khubor u Conrad u la pynrem jur ia kane ka kam thombor bad ong ba ka jingtohkit halor kane ka jingjia ka la iaid shakhmat ban ioh kem ia ki runar kiba donkti bad ban pynshitom ia ki katkum ka ain.

U CM u la pynpaw ruh ba u la ioh ban iakren bad kiba haiing hasem jong une u lanot lyngba ka phone ban pynpaw ka jingsngewlem ha kaba iadei bad kane ka jingjia bad pynthikna ruh ha ki ba na ka liang ka sorkar kan shimkhia halor kane ka jingjia bad ban kem ia ki briew kiba donkti.

Ha kajuh ka por u CM u pyntip ruh ba u la khot ia u Chief Secretary bad u Director General of Police (DGP) sha ka jingialang bad bthah ba kin peit pyrman ha kaba iadei bad ka jinglong jingman ha ka nongbah Shillong bad ha kiwei kiwei pat ki jaka.

Khnang ban pynthikna ban khmih bniah halor ka jinglong jingman, na ka liang u CM u la pyntip ba na ka liang ka sorkar kan pynbiang ia ki bor pahara, bad lada donkam kan dang pan shuh shuh ki bor pahara.

Lah ban kdew ba utei u nongtrei bylla sngi uba dei u bar Jylla uba shong ba sah ha Nongmensong u la shah thombor kat haduh ba u la duh ei ia la ka jong ka jingim ha ki runar ki bym lah satia ban ithuh ha ka thain Mawlai Mawroh, Shillong.

Katkum ka jingiathuh da u SP ka East Khasi Hills u Rituraj Ravi la ong ba kane ka jingjia shah thombor ka la jia ha ka sngi Balang ba la lah ha ka por kumba 11:15 mynstep.

U la ong ruh ba ia une u lanot ba la shah bom iap la tip kyrteng kum u Arjun Ray 52 snem rta uba la khlad noh namar ka jingmynsaw jur hapoh NEIGRIHMS.