Pynrem u Dy CM ia ka jingkwah iakhih paidbah u president ka VPP kum ha Bangladesh

Syllad | The Rising MeghalayaAugust 22, 2024

U nongialam ka NPP uba dei ruh u Symbud Myntri Rangbah ka Jylla, u Bah Sniawbhalang Dhar ha ka 21 tarik Nailar u la pynrem jur ia ka jingkren ba dang shen jong u President ka VPP u Bah Ardent M Basaiawmoit uba la ong ba ka Meghalaya ruh ka donkam ia ka jingiakhih paidbah kaba iasyriem kum ha Bangladesh.

“Nga pynrem jur ia kaba kum kane ka jingkren. Ngi dei ki nongialam kiba don ia ka jingkitkhlieh na ka bynta ka Jylla. Kum ki nongialam ka Jylla ka dei ka kamram jong ngi ban pynthikna ia ka shongsuk shongsain ha ka Jylla. Ka shongsuk shongsain ha ka jylla ka dei ka thong kaba kongsan tam ka jong ngi,” pynpaw u Sniawbhalang sha ki lad pathai khubor.

U la ong ruh, “Ngam tharai ba ki paidbah ka Jylla kin sngewtynnah ia kiba kum kine ki jingkren ba kin mih na ki nongialam sain pyrthei ka Jylla. Nga kyrpad ia baroh ki nongialam bad ki samla ba kim dei ban don ia kum kane ka jingmut jingpyrkhat. To ngin pyrshang ban tei ia ka Jylla. Lada ngi lah, ngi kwah ban rat dyngkhong ia ka jingkynrei jong u drok bad ki kam bymman, ka dei ka kamram ka jong ngi.”

Nalor kata une u Myntri u la ong, “Ban ong ba ngi kwah ia kajuh ka jingiakhih paidbah kumba la jia hapoh ka ri Bangladesh, Ngam tip uba kum uei une u nongialam u ban kwah ba ka Meghalaya ruh kan ngat ha ka juh ka jinglong jingman kumba la jia hapoh Bangladesh.”