Pynrung iaki nonghikai SSA hapoh ka tnad pule puthi ka Jylla: HYC

Syllad | The Rising MeghalayaNovember 6, 2021

Ka HYC central body ka pynrem jur ia jingleh mynti ka sorkar jylla halor ki mat dawa jong ki nonghikai skul SSA. Ka HYC ka sngewlem bad ka kyrshan tylli tyllan ia ki Nonghikai SSA bad ia ki mat dawa jong ki.

Ka jingbym seiw tulop ka sorkar Meghalaya ia ki Nonghikai SSA mynta la 5 bnai eiei, ka jingkren khlem ka jingkit khlieh jong u Myntri ka tnad pule ka Jylla ba ka sorkar Meghalaya kam lah ban pynlong noh ia ki Nonghikai SSA kum ki nonghikai ka Jylla da kaba pynrung noh ia ki ha ka education department ka Jylla bad ka jing kyntait ka sorkar ban kyntiew ia ka tulop ki nonghikai SSA wat ha pdeng ka jingkiew dor lut ki marbam, ka bai wai ing , ka petrol,.diesel, LPG, ka bai light bad ki wei ki wei ka long kaei kaei kaba mynsaw bad ka ap jingma ia ka jingnang kiew ka pule puthi ha ka Jylla hi baroh kawei. Ngi ioh jingtip ba don kumba 12541 ngut ki nonghikai SSA ha Jylla bad kumba 2907 ki LP school bad kumba 2259 tylli ki UP school , kaei kaban jia ia kine ki skul bad ia ki khynnah pule ha kine ki skul, hato yn khang kyrdep noh ia ki tang namar ka jingmynthi ka sorkar Meghalaya. Kane ka jingleh kamkai ka Jylla kan sa pynhiar ia ka jingnang thoh bad pule ne ka literacy rate ka Jylla ha ki snem ban wan bad kan nang pynsah dien shuh shuh ia ka Jylla .

Ha ka snem 2021 ngi la don ki minister kiba failed class 12 lai sien, hato ha ki snem ban wan ngin ioh kiba failed class 10 lai sien bad kham hadien ki minister ba shu soi da ka kti kmie ha ki kot ki sla, shaei ka lawei ka Jylla lada ka sorkar kan dang shim sting kumne ban peit ia ka bha ka miat ki nonghikai.

Kumno kata ka sorkar India kam ai pisa ban siew tulop tang ia ki Nonghikai SSA ha Meghalaya katba ha ki wei ki Jylla ngim iohi ba duh tulop kita ki nonghikai SSA. Ka SSA ka dei ka Scheme kaba la mang pisa lypa da ka budget ka India ha kano ka rukom kam kai kata ka pisa. Ka HYC ka suba ba kane ka jingong ka sorkar Meghalaya ba hana ym pat ioh pisa bai tulop SSA na ka sorkar India ka dei kaba shu lamler bad ka bym don kano kano ka jingshisha. Lada dei ba kam pat pynlait shisha ruh balei kata ka sorkar Meghalaya kam lah ban ia kren bad ka sorkar India ban pynlait noh. Ka HYC ka kyntu jur ia ka sorkar Meghalaya ba Kan pynlait noh mardor ia ka tulop ki nonghikai SSA.

Ka HYC ka dawa ba dei ban kyntiew noh ia ka tulop ki nonghikai SSA bad dei ruh ban pynrung noh ia ki kum ki nonghikai ka sorkar Jylla kumba la leh da ki phew tylli ki jylla ha kylleng ka Ri India .

Robertjune Kharjahrin
President, HYC