Pynsah kynmaw ka Indian Army ia ki ksew shipai ba la shongthait da ka jingim kaba thymmai

Syllad | The Rising MeghalayaDecember 23, 2024

Ka Tnad shipai Indian Army ka la pynsah kynmaw da ka sienjam kaba thymmai ban aijingkmen ia ki ksew ba la shongthait jong ki da kaba ai ia ki ka jingim kaba ar kum ki paralok bad ki nong iarap ban kyntiew ia ka koit ka khiah jong ki briew lyngba ka jingiadei kaba jan ka jong ki.

Kine ki jait jingri ba kyrpang kiba la shim ia ki bynta kiba kongsan kum ka jinglapdien ia ki tiar pynbthei, ki kam pyllait im na ki jingtwa ki lum thah, ki kam ban wad bad pyllait im bad ha ki kam pahara mynta kin wanrah ia ka jingkmen, ka jingsuk bad ka jingkyrshan ia ki skul kiba donkam kyrpang bad ia ki longiing ha kylleng ka ri.

Ha ka sienjam kaba pynlung mynsiem ban rakhe ia ka Remount Veterinary Corps Day kaba 246, ka tnad shipai Indian Army ka la aiti ia ki 12 tylli ki ksew kiba la shongthait sha ki skul Asha bad ki nongshong shnong kiba don ia ka jingieid ia kine ki jingri. Kane ka sienjam ka thmu ban pynpaw ia ka jingkular jong ka tnad shipai ban leh burom ia ki riewialeh ba jar jar da kaba leh ia ki da kajuh ka jingburom bad ka jingsumar kumba ai ia ki bor shipai.

Kine ki (ksew) shlur ki la treikam ha ki jaka kiba eh bad shitom bad ba don jingma, kaba pynpaw ia ka jingshlur bad ka jingaiti lut ka jong ki kaba iadei dur ba ki paralok briew jong ki. Ka jingnoh synniang ba kongsan jong ki, ki la kyntiew shibun ia ka jingshngain jong ka ri bad ha ki kam aijingiarap sha ki briew. Ka tnad shipai ka la nangpyndonkam shuh shuh ia ki jait ksew tynrai ba la pynkha khleh kum ki Rampur Hound, Mudhol Hound, Combai, Chippiparai, bad Rajapalyam nalor kiwei pat ki jait ksew tynrai na ka bynta kiba kum kine ki jaid kam.

Hadien ba la shongthait, ia kine ki ksew la sumar ha ka Canine Geriatric Centre in Meerut Cantt, ha kaba ki ioh ia ka jingsumar kaba paka na ki doktor mrad bad pynlut ia ki snem kiba sah jong ki ha ka jingsuk jingkmen.Ka tnad shipai ka pynneh ruh ia kiba kum kine ki jaka na ka bynta ki ksew shipai kiba la shongthait kaba pyni ia ka rukom treikam kaba phaikhmat kyrpang ruh na ka bynta ka bha ka miat jong baroh kiba kum kine ki jaid jingri jong ka.

Ki ksew shipai ba la shongthait ki shem ruh ia ki bynta kiba don jingmut kum ki lad aijingsumar, khamtam ha ki skul na ka bynta ki khynnah kiba don jingduna.Ka jinglong ba jemnud bad ki jinghikai kyrpang kiba ki la ioh ki iarap shibun ban pynbha bad kyntiew ia ki khynnah ha ka imlang sahlang, ka jingsngew bad ia ki jingmut jingpyrkhat. Ki longiing kiba ting ia kine ki ksew ki ioh ruh ia ki jingmyntoi na ka jingiadei kaba jan bad ki bad ka jinglong paralok ba iai neh.

U Director General ka Remount Veterinary Services u la pynksan ia ka jingaiti jong ki shipai ha kaba pynkha, pynheh pynsan bad hikai ia kine ki ksew bad ban pynthikna ba kin ioh ia ka jingburom bad jingsumar ha ka por bad hadien ba ki la dep ban ai jingshakri. Kane ka sienjam kaba da pyrkhat janai ka pynpaw ia ka jingangnud jong ki shipai India ban pynroi ia ka jingiadei hapdeng ki briew bad ki mrad katba ka buh nuksa ka jingsngewlem bad ka jingsngewkhia ia ka imlang sahlang.