Pynsah nam ka Tympang Club Jowai ia u Larsingh Khyriem

Syllad | The Rising MeghalayaDecember 30, 2023

Kan long ka khana kaban sah kynmaw pateng la pateng haka history jong ka Tympang Club, Jowai ha kaba haka 29 tarik Nohprah kala shim iaka sienjam ban plie iaka auditorium kaba kynthup lang iaka indoor hall da kaba pynsah nam ha u riewkhraw pyrkhat ka shnong bad ka imlang sahlang ka sor Jowai bad ka Jylla uba long ruh u nongthaw aiñ.

Une u riewkhraw u dei u Larsingh Khyriem, u don ka bynta kaba khraw ban pynioh iaka jaka ban tei iaka hall naduh ka por synshar ka Assam iaka Jylla Meghalaya. Katkum ka khana une u riew khraw u dei ruh u nongthaw aiñ uba ieng rangbah ban pyrshah iaka jingphiah ia u pud u sam hapdeng ka Meghalaya bad Assam.

Une u rangbah ula ieng pyrshah ban phiah iaka Jowai Sub Division ban pyniasoh iaka Block I bad Block II sha ka Mikir Hills (Karbi Anglong ba mynta) ha ki snem 1951 haka por ka United Khasi Jaintia Autonomous District.

Ha kane ka sngi la plie ruh ia u mot sah nam une u riewkhraw jong ka shnong, wat la um don shuh haka pyrthei, hynrei ka nam ka burom jong u kan neh na ka bynta ki longdien mandien ka ban pyrsad mynsiem bad bud iaki nuksa bad ki kam ba bha jong u kum u nongprat lynti.

Ia kane ka hall bad u mot la plie da ka Meirad Carolina Lamare, kawei na ki riew tymmen ka club.

Ka jingtei ia kane ka hall kala neh bun bun snem. Naduh mynta ka kynti ia kane ka hall yn tip iaka kum ka Larsingh Khyriem Memorial Auditorium cum Indoor Sports Hall.

Shwa ka jingplie paidbah la ioh ka jingduwai kyrkhu kyrpang na u Ma SC Laloo MCS haka jingdonlang ki nongialang bad ki dkhot nongkitkam ka Tympang Club, ki nongshong Shnong bad ki bahaiing hasem jong u (L) Larsingh Khyriem.

U Secretary barim ka Construction Committee Ma Homeland Lamar, haka jingkren ula iathuh ba ka jinglut ban tei iaka iing Hall ka la kot sha ka 89 lak tam tyngka.

Iaka jingialang la pyniaid da u Chairman ka Tympang Club Jowai Ma Edelweiss Rogers Dkhar, ka jingkren lyngkot na ka pyrsa bad khun jong u Larsingh Khyriem ka Kong Manika Khyriem, ka Kong Wimon Tariang bad na u Ma Teiborlang Passah Adviser Tympang Club.

Ha kane kajuh ka janmiet ka Tympang Club Jowai ka la pynkup burom iaki khun samla ka Shnong kiba la wan pass bha haki jingpule haki kyrdan bapher bapher, kumjuh sha ki riew tymmen kiba la heh rta bad sha baroh kiba don bynta ban kyntiew iaka Club.