Pynsah ram ka Tnat Pulit haduh 10 klur ba wai ia ki kali paidbah ha ki 10 tylli ki District

Syllad | The Rising MeghalayaOctober 11, 2024

Ka Tnad Pulit ka Meghalaya kam pat shym la siew satia ia ka bai wai kali kaba la kot haduh T.10.45 klur na kaba shim wai ia ki 156 tylli ki kali shimet ha ki 10 tylli ki district ka Jylla.

Kane ka long katkum ka jingpynpaw lyngba ka jinglap RTI jong u Bah Disparsing Rani uba dei u nongshong shnong ka Upper Shillong ha ka 11 tarik u Risaw.

Kumba ka long mynta ki don 593 tylli ki kali pulit kiba don ia u registration ML-02 ha ki 10 tylli ki District ka Rilum Khasi Jaintia bad Garo. Hynrei ym pat shym la ioh ia ki jingtip ha kaba iadei bad ka Nongstoin, West Khasi Hills bad Baghmara, South Garo Hills.

Haba kren sha ki lad pathai khubor, u Bah Disparsing u la ong ba ki pulit ka East Khasi Hills ki dei kiba pynsah bun eh ka bai wai kali, kata haduh T.5.92 klur ha kaba ki kali ba la shim wai ki long haduh 74 tylli. Nangta bud sa ka West Garo Hills da T.1.58 klur, kata ha kaba shim wai ia ki 35 tylli ki kali, ka South West Khasi Hills T.21.5 lak na ka bynta ki 6 tylli ki kali, ka Eastern West Khasi Hills T.7.93 lakh na ka bynta laitylli ki kali, ka South West Garo Hills T. 32 lak na ka bynta 13 tylli ki kali, North Garo Hills T.98.66 lak na ka bynta 15 tylli ki kali bad ka East Garo Hills T.57.35 lak na kaba shim wai ia 10 tylli ki kali shimet.

Hynrei, ha ki laitylli ki district, ka Tnat kam shym la lah ban ai ia ki jingtip ba la pan ha kaba iadei bad kane ka phang. Katba ki pulit ka East Jaintia Hills ki la pynpaw ba kim lah ban iathuh ia ki nombor plate jong ki kali shimet da kaba ong ba la khang pyrshah katkum ki kyndon 8 (g) jong ka RTI Act, 2005, hynrei ki la pynpaw ba ka pisa kaba sah na kaba wai kali ka long T.8.91 lak. Kumjuh ka West Jaintia Hills ruh ka la pynpaw ia kajuh ka daw da kaba kdew tang ia ka pisa bai wai kali kaba sah kaba long T.67.57 lak” ula ong.

Nalor kata une u nongwad RTI u la kynnoh ruh ba ka jingshim wai ia ki kali shimet da ka Tnat pult ka long kaba beain katkum ka section 66 jong ka Motor Vehicles Act, 1988. “Kane ka Act ka kdew shai ba phim lah ban shim wai ia ki kali ki bym shym la register kum ki kali kamai,” u la ong.

Kumjuh haba pynpaw ba ka Sorkar ka dang don mynta ha ka jingpynkhreh ban wanrah shen ia ka Meghalaya Vehicles Act bad Rules, u Bah Disparsing Rani u la ong, “Ka jingkylli ka long ba ka Meghalaya Vehicle Act ne Rule mynta u snem kan pynrung lang ne em ia ka kyndon 66. Lada em, kan sa don ka jyrsieh ha Meghalaya namar kiba bun na ki kali ba shim wai da ki Tnad bad kompeni ki dei ki kali shimet.Kane ka long kaba beain.”

Shuh shuh haba kdew ia ka kaiphod jong ka Central Vigilance Commission (CVC) halor ki jingleh bym hok ha ki jingshim wai ia ki kali shimet, u Bah Rani u la ong, “Ka kaiphod ka CVC ka la pynpaw ba ki la don ki jingleh bym hok namar tang kito ki briew kiba don jingiadei ki ioh ia ki bill katba kito ki bym don jingiadei kim shym la ioh satia.