Pynsangeh ka KSU ïaka jingker sainar shiah ha Huroi

Syllad | The Rising MeghalayaAugust 17, 2019

KHLIEHRIAT: Ka Khasi Students’ Union (KSU) Narpuh Circle haka sngi Saitjaiñ hapoh ka jingialam u President KSU Narpuh Bah KS Suchiang,General Secretary KSU Narpuh  Bah Sanatomba Bamon, ki dkhot bad ka jingiadonlang ki dkhot ka KSU Huroi Unit kila leit pynsangeh shisyndon ïa ka jingpyntrei ker sainar shiah (Border fencing) bad ka jingpyntrei surok ha shilynter khappud bad ka ri Bangladesh haka shnong Huroi, East Jaiñtia Hills District.

Ka KSU kala kynnoh ba ka daw ba pynlong ïaka KSU ban hiar pynsangeh ia kane ka jingker sainar shiah bad jingtrei surok ha katei ka jaka khappud ka long namar ba ka company NBCC ba pyntrei ia ka surok khappud bad jingker sainar shiah bad ka sorkar jylla kim shym la siew ïa ka bai luksan (Compensation) sha ki trai jaka ba shah ktah ka jingjulor na katei ka jingpyntrei.

Lah ban pynkynmaw ba na ka liang ka KSU Huroi Unit ka la dep pynsangeh shisien ia katei ka jingtrei ha ka 29 tarik u Naiwieng 2018, hynrei ki bor synshar District lyngba ka ophis u Deputy Commissioner East Jaiñtia Hills District kala kular ban siew iaka bai musur klhyndew bad kala kyrpad ia ka KSU ban ailad ia katei ka company ban trei iaka kam.

Ki bnai ki snem kala nang iaid, ka KSU kam shym la ïoh kano kano ka jubab na ka sorkar ne na ka company NBCC. Kane ka jingleh bymsuidniew ka sorkar kala pynbitar ïaki nongialam ka KSU bad ki trai jaka bad kila hiar biang ban pynsangeh iaka jingtrei ker sainar shiah bad shna surok.

Ka KSU kala kam ba kam banse ban leit pynsangeh shisyndon ia katei jingker sainar shiah bad surok ha katei ka shnong kaba la iaid shait shait mynta, hynrei ki trai jaka kiba shah ktah pat kim pat ioh ïaka bai lutksan haduh mynta.

KaKSU bad ki trai jaka kila shim ïaka rai ba kin nym ailad ia katei ka company ban trei ha katei ka jaka tad haduh ba kila ïoh ïaka jingdawa. “Ngi dawa ïa ka hok, ka company NBCC bad ka sorkar kim donhok ban leh donbor ne thombor ïaki trai jaka,” la ong u General Secretary ka KSU Narpuh Circle u bah Sanatomba Bamon.