Pynsangeh ka KSU ïaka jingpynrung kyrteng Aadhaar ïaki spah ngut ki bar jylla ha Dalmia Cement

Syllad | The Rising MeghalayaMay 6, 2019

KHLIEHRIAT: Ka  Khasi Students’ Union (KSU), Narpuh Circle haka sngi Nyngkong kala leit hiar haka kharkhana dewbilat  Dalmia Cement Bharat Limited kaba don ha Thangskai East Jaiñtia Hills ban pynsangeh mardor iaka jingthmu pynrung kyrteng Aadhaar ïaki spah spah ngut ki bar jylla kiba trei bylla ha katei ka kharkhana.

Ka KSU kala kynnoh ba la leh sop sop ïaka jingpynrung kyrteng Aadhaar hapoh katei ka kharkhana bad la suba jur ba ka don eiei sha lyndet bad ka KSU kala phah pynsangeh mardor ia kane ka jingpynrung kyrteng Aadhaar  namar ba bun na ki bar jylla ki dei tang ki nongbylla sngi kiba wan na Assam bad kiwei kiwei ki jylla bad kim bym don satia kino kino ki kot ki sla ban pynthikna ba ki dei ki nongshong shnong ka Ri India.

Katba na kaliang ki nongtrei katei ka kharkhana kila kam ba ka jingthmu ban pynrung kyrteng addhar ka long tang na ka bynta ki nongtrei ka kharkhana, da kaba kam ba lada kim don aadhaar kim ioh ban sei ia ka Provident Fund  jong ki.

U Ma Kwillness  Suchiang President ka KSU Narpuh Circle ula ong ba naka liang ka KSU kan nym ailad satia iaki bar Jylla ban ioh pynrung kyrteng Aadhaar ha katei ka thain , lada ki donkam Aadhaar kila dei ban leit pynrung kyrteng sha shnong trai lajong.

Kane ka jingleh ka kharkhana dewbilat ban pynrung kyrteng sop sop ia ki nongtrei bylla barjylla ka buh ka jingma kaba khraw ia ka thaiñ bad ka jaidbynriew namar bun na kitei ki poiei dei kiba wan na ri Bangladesh, Assam bad na kiwei kiwei ki jylla bymdon ki kot ki sla ba biang, ula ong u nongialam ka KSU u Ma Kwillness Suchiang.

Ka KSU kala maham ïa kane ka kharkhana ban sangeh ia kane ka jingleh tuh ban kdup ia ki poiwir bad  lada kan lap biang kan pyni da ka kam.

“Ka Assam ka dei ka ktem ki khar Bangladesh, ki sah tang katto katne sngi ha katei ka jylla ki ioh epic, pan card, nangta ki wan bsuh khlieh sha ka jylla jong ngi da kaba leh mynleh wad kam bylla, hynrei ki kam pat da kumwei,” la ong Deibormi Dkhar General Secretary KSU Narpuh Circle bad ula bynrap ba dei halor kane ka nongrim ba ki pyrshah namar ba kim kwah ba katei ka thain kan shah tyllep ha u poiei shisngi.