Pynsangeh ka MSPCB ban seng karkhana coke ha Wapungskur

Syllad | The Rising MeghalayaApril 15, 2025

Ka Meghalaya State Pollution Control Board (MSPCB) ka la bthah ia ka M/s Om Om Coke ba kan pynsangeh noh ia baroh ki jingtei kiba iadei bad ka jingseng ia ka karkhana coke ha Thlukuru, East Jaintia Hills hadien ka jingpynduh noh ia ka No-Objection Certificate (NoC) da u Dolloi ka Jowai Elaka.

Kane ka la wan long hadien ba ka Dorbar Shnong Wapungskur ka la pyrshah jur halor ka jingtyrwa ban seng ia ka karkhana coke da kaba kdew ba ka jaka ha Thlukuru, Mookhep ka dei kaba dang hap hapoh u pud u sam jong ka.

“Nga pyntip sha phi ba kane ka ophis ka la ioh pdiang ia ka shithi ban weng bad pyndam noh ia ka NoC ba la ai da u Dolloi, ka Jowai Elaka bad u Waheh shnong ka Mookhep. Halor kane, la bhah ia phi ban pynsangeh noh ia baroh ki jingtei kiba iadei bad ka jingseng ia ka karkhana coke ha Thluburu Wah Tongtiang, East Jaintia Hills,” ong u Member Secretary ka MSPCB u Dr GH Chyrmang ha ka shithi ba la phah sha ka M/s Om Om Coke ha ka 14 tarik Iaiong.

Ia kane ka rai la pyntip ruh sha ka kynhun jong ka Dorbar Shnong Wapungskur kaba la dawa jur ban pyndam noh ia ka CTE lane kino kino ki kot ki sla ne laisen ia kiba la ai sha kane ka kompeni.

Na ka liang kane ka kynhun ka la maham ruh ban shim da ka lynti jong ka ain lada ailad ia kane ka kompeni ba kan seng ia ka karkana coke hapoh u pud u sam jong ka shnong.

Lah ban kdew ba ha ka 10 tarik Iaiong u Dolloi ka Jowai Elaka u Bah Puramon Kynjing u la pynmih ia ka hukum ba la pyndam noh ia ka NoC ba la ai na ka bynta ban seng ia kane ka karkhana coke. Shwa kane na ka liang u Rangbah Shnong ka Mookhep u Bah Denish Siangshai ruh u la phah da ka shithi sha u Dolloi ha ka 4 tarik Iaiong na ka bynta ban pynduh pyndam noh ia kane ka jingai NoC.