Pynsangeh ka Sorkar ia ka jingdonkam ai injek ban ioh birth certificate khnang ban pynrung Aadhaar

Syllad | The Rising MeghalayaMarch 21, 2025

Ka Sorkar Jylla ka la bthah ban pynsangeh shwa ia ka jingdonkam ban hap ai injek na ka bynta ban ai birth certificate na ka bynta ar bnai khnang ban ioh pynrung kyrteng Aadhaar bad pynthikna ia ka jingioh jingmyntoi khlem jingthud lyngba ka Integrated Child Development Services (ICDS) na ka bynta baroh ki khunlung kiba dang kha.

Ka jingpynbna ba la pynmih da u Commissioner & Secretary ka Tnad ka koit ka khiah, u Dr Joram Beda ha ka 18 tarik Lber ka ong ba la bthah ia baroh ki District Registrar of Births and Deaths ba kin ai beit ia ki birth certificate sha baroh kiba aplai khlem da khmih ia ki khunlung ki dei kiba la ai ne ki bym pat ai injek.

Ia ka jingai injek lah ban buh jingthoh la ka jong bad ban buddien pat hadien kum shibynta jong ka jingleit ai injek kylleng ki jaka, hynrei ym dei ban pyniasoh sha ka jingai birth certificate.

Ki dkhot ka Tnad ka koit ka khiah bad ICDS ki dei ban bteng ia ki jingialap halor ka jingai injek ban pynthikna ba baroh ki khunlung kin ioh ia ka jingai injek ha ka por kaba biang.

Yn pynlong ia ka jingbishar bniah ia kane ka polisi ha kaba kut jong ka ar bnai ban bishar ia ka jingktah jong ka bad ban tip ia ka jingdonkam ban bteng ne pynkylla shuh shuh, ong ka jingpynbna.

Ia kane ka rai la shim hadien ba la wanrah ha ka jingtip jong ka sorkar ba ka jingdonkam ban ai injek kum ka kyndon shwa ban ai ia ki birth certificate ka la wanrah ka jingpynslem kaba jur ha ka jingpynrung kyrteng ia ki khunlung kiba dang kha.

Kaba kum kane ka jingpynslem ka lam sha ka jingbym lah jong ki kmie ki kpa ban pynioh Aadhaar ia la ki khun ba dang kha ha ka por kaba biang, bad kaba ktah pat ha kaba iadei bad ka jingioh jong ki ia ki skhim bapher bapher jong ka sorkar khamtam ka Integrated Child Development Services (ICDS).

Ka Aadhaar card ka dei kawei na ki kot kiba donkam bad kongsan na ka bynta ban ioh ia ki jingmyntoi hapoh ka ICDS, kata kynthup ia ki jingbam ba tei, ki lad jingsumar, ka jingai jinghikai dang kloi ia ki Khunlung, bad ka jingpynslem ban ai ia ka, ka lah ban pynduh ia ka hok ka jong ki.