Pynsangeh ki samla pule NEHU iaka jingshah thngan ba shah ktah jur ha ka koit ka khiah

Syllad | The Rising MeghalayaNovember 20, 2024

Ki samla pule ka skulbah North Eastern Hill University (NEHU) ha ka 20 tarik Naiwieng kila rai ban pynsangeh noh shipor ia ka jingiakhih shah thngan ka jong ki kaba la iaid mynta lah 16 sngi na ka daw ka jingshah ktah jur ha ka liang ka koit ka khiah.

Ia kane ka rai la pynbna da u President ka NEHU Students’ Union (NEHUSU) u samla Sandy Sohtun ha ka jingiadon lang ki nongialam ka KSU-NEHU Unit bad ki samla pule ba pynlong jingiakhih, ki seng jong ki nonghikai, ki nongtrei ka NEHU bad kiwei kiwei.

Ka jingshim ia kane ka rai ka la wan long ruh hadien ba ka la don ka jingai jingmut na ka liang ki doktor kiba peit ba khmih ia ka koit ka khiah jong ki samla man ka sngi bad kumjuh ia ka jingai jingmut da ki nonghikai bad ki nongtrei ka skulbah.

U Samla Sandy u la ong, “Hadien ba la pynshong nongrim ia ki jingai jingmut da ki doktor ha kaba iadei bad ka jingshah ktah jur ha ka liang ka koit ka khiah namar kane ka jingshah thngan kaba la kynjoh mynta ha ka 16 sngi, kumta ngi na ka liang ka NEHUSU bad KSU- NEHU Unit ngi la shim ia ka rai ban pynsangeh shipor ia kane ka jingshah thngan. Hynrei kane kam mut pat ban pynkut noh ia kane ka jingiakhih, ngin bteng iaka jingiakhih haki sngi pohia naduh 9 baje mynstep haduh 5 baje janmiet bad ngin ym kynriah na kane ka jaka tad haduh ban da urlong ka jingdawa, ula ong.”

Lah ban kdew ba kane ka jingiakhih jong ki samla pule NEHU ha ka phyllaw jong kane ka skulbah ka la sdang naduh ka 5 tarik Naiwieng ban dawa hiar shuki ia u Prof PS Shukla kum u Vice Chancellor ka NEHU bad ban weng kam noh mardor ia u Registrar bad Deputy Registrar.

Kane ka la wan long ruh wat hadien ba na ka liang ka Ministry of Education ka Sorkar Pdeng ka la thung da ka Inquiry Committee kaba kynthup ia ki arngut ki dkhot ban pynlong ia ka jingtohkit halor ki jingkynnoh pyniaid kam ba bakla bad ka jingbym nang pyniaid ia ki kam ki jam jong ka skulbah NEHU.

Hapdeng kane ka jingiakhih shah thngan ki la don bun ngut ki samla pule kiba la shah pynkit noh shapoh ka hospital namar ka jingkem tlot bad ki don ruh kiba la ngat ha ki jingshitom kiba kham shah ktah jur.