Pynsangeh shwa ban ai Trading License thymmai ha Jaintia Hills: AJYWO
JOWAI: Ka AJYWO Central Body ka la dawa na ka JHADC ba ka dei ban sangeh shwa ban ai Trading Licence thymmai sha ki nongwei ha Jaintia Hills baroh kawei bad ruh bad da bishar bniah bha kat kum ki kyndon aiñ shuwa ban ai Trading License, khnang ba ka Trading License kan ym ktah ia ki trai ri trai muluk.
“Ka jingioh NOC bad Trading License pathar jong ki nongwei ha Jaintia Hills khlem da bishar bniah shwa ban ai; ka jingioh wan khaii-pateng bad ka jingioh wan trei bylla laitluid jong ki bar jylla ha Jaintia Hills, khlem da iaid kat kum ki kyndon aiñ, ka la buh ha ka jingma ia ka kamai ka jih, ka ioh kam ioh jam bad ka iap ka im jong ka jaidbynriew baroh kawei”, ong u Bah MH Dkhar, President jong ka AJYWO Central Body.
![](https://www.syllad.com/wp-content/uploads/2024/09/JIT-Vacancy-823x1024.avif)
Ki RTIs kiba ka AJYWO ka la pan man ka ka por, ha ka jingiadei bad ka Trading License bad ka Employee’s Service License ka pynsngew sih kthang ia ka seng, namar ka jingbym shim khia jong ka JHADC ha ka jingiadei ba kine. Haei ki briew jong ngi kin dang ioh shuh ban bsuh khlieh ia lade ha ki lad kamai-kajih bad ioh kam ioh jam ha ri la jong, lada baroh kine la kurup lut da u nongwei?”, bynrap biang u Bah M H Dkhar.
U M H Dkhar u la ong shuh shuh, ba ka kamram jong ka JHADC ka dei ban peit nyngkong eh ia ka bha ka miat bad ka iap ka im jong ka Ri bad ka Jaidbynriew trai ri trai muluk. Kumta, ka AJYWO ka dawa na ka JHADC ka dei ban da pyrkhat sani bha bad ruh ba ka dei ban iaid thik-pa-thik kat kum ki kyndon jong ka, The Jaintia Hills Autonomous District (Trading by Non-Tribals) Regulation Act-2011 bad ka The Jaintia Hills Autonomous District (Trading by Non-Tribals) Rules-2015, ha shuwa ban ai Trading License. Ki tei ki aiñ, ki kren shai ba dei ban da bishar bniah bha la ki kam khaii-pateng ba pan Trading License da ki nongwei ki dei ne em ki kam ba ki trai ri trai muluk ki lah bann leh. Lada dei kiba ki briew jong ngi ki lah ban leh ne ki lah leh, ka JHADC kam bit shuh ban ai Trading License khnang ba kan ym ktah ia ki kit rai ri trai muluk.
Ka AJYWO ka la dawa jur na ka JHADC ban sangeh shwa ka ai Trading License thymmai bad ruh ban da pyrkhat lem ia ka jaidbynriew lade ha baroh ki liang shwa ban ktah ia ka jingai Trading License. Ka seng ka dawa ruh na ka JHADC ba ka dei ban khynra Trading License bad Employee’s Service License man ka por ha baroh kawei ka Jaintia Hills bad ruh ban khang noh baroh ki dukan bym don Trading Licence khnang ban plie lad ia ki trai ri trai muluk jong ngi ha ki lad kamai kajih ha ri lajong.
Leave a Reply