Pynshai ka COMSO halor ka jingdawa ILP

Syllad | The Rising MeghalayaMarch 21, 2019

Na ka liang ka CoMSO  (CoHSO bad ka AGHJAC)  ngi kwah ban pynshai ba na ka liang ka kynhun ka dawa ia ka Inner Line Permit system (ILP) ha baroh kawei ka jylla Meghalaya ban  teh lakam ia ka jingrung kyrthep bad ioh buhai shnong laitlan ki poiwir ha ka jylla Meghalaya. Naduh ba sdang ngi la dawa ba ka sorkar Meghalaya ka dei ban pyntreikam ia ka Bengal Eastern Frontier Regulation Act, na ka liang ka sorkar ka la pynshai ba  naduh bala weng noh ia ka Garo hill na ka Bengal Eastern Frontier Regulation Act ka buh jingeh ia ka jylla namar ka  Bengal Eastern Frontier Regulation Act kadei ka Aiñ ba mih na ka sorkar pdeng ym dei na ka jylla, ban pynrung biang ia ka Garo Hill ki hap shna da ka bill na Parliament ym na ka state legislative assembly.

Ha kajuh ka por ka la don ka jingtynruh ba man ka por na ki wei ki sengbhalang ka jylla ba dei ban implement noh ia Meghalaya Residential Safety And Security Act (MRSSA) bad buh noh ki Entry and Exit Point.

Na ka liang ka jong ngi ngi la pynpaw la bun sien ba ka Meghalaya Residential Safety And Security Act kumba ka long mynta kam biang bad kam lah ban iada ia ka jaidbynriew, ngi pynpaw shai ruh ba ka sorkar ka dei ban pyntreikam ia ka Inner Line Permit system,  kumta ban ap ia ka Parliament ba kan amend ia ka Bengal Eastern Frontier Regulation Act kan sa shim por lane kin nym treh hi ruh lehse bad ban teinoh ia kita ki entry n exit kumba dawa kiwei ki sengbhalang kala donkam ban pynkhlain shuh shuh ia ka MRSSA 2016 bad yn pynkhlain ia ka da kaba pynrung noh ia ki kyndon jong ka Bengal Eastern Frontier Regulation Act ha ka Meghalaya Residential Safety And Security Act , lane ban pynrung ia ki kyndon jong ka inner line permit system ha ka Meghalaya Residential Safety And Security Act khnang ba kan khlain bad don ki bniat jong ka ILP.

Kita ki kyndon ki long:

1. Baroh ki bar jylla bad ki bar ri ki dei ban pan jingbit ha shwa ban rung bad sah ha ka jylla Meghalaya. Ha shwa ban ai jingbit dei ban dang register shwa ia kita ki poiwir bad phah submit bun ki kot ki sla .
2. Lada ai ka jingbit ym dei ban ai palat ia ka 179 sngi.
3. Lada ki rung bad ki sah khlem ka jingbit hap pynshitom da kaba dain Kuna ne set patok bad dei ruh ban beh noh ia ki na ka jylla .

Ka bynta jong ka jingkhang ia ki bar jylla ban thied jaka ne khyndew la ki dei ki Tribal ne ki Non Tribal kaba don ha ka section 7 jong ka Bengal Eastern Frontier Regulation Act namar ba ka la don ka Meghalaya Land Transfer Act ka khambha ban khang noh ia ki tribal bar jylla ban thied jaka ne khyndew da kaba weng noh ia ki na ka list ha ka ST order 1950. Kaba mut ha Meghalaya laitnoh ki Hynniewtrep bad ki Garo ki wei kim dei shuh ki Tribal bad kim lah shuh ban thied khyndew. Ngi lah ban leh ia kane da kaba suk namar wat ka Supreme Court ruh ka la hukum ba ki immigrant kim lah ban kam ba ki dei ki ST ne SC ne OBC ha ka jylla ba ki leit poiwir.

Nalor kine, ka la idei ruh ban don ka snem ot kyrteng daba batai noh mano ki illegal resident, mano ki temporary resident bad mano ki permanent resident da kaba phah pynbeit ia ka notification kaba dei halor ka jingai Permanent Resident Certificate. Ngi la dawa ba tang ki trai muluk (Hynniewtrep bad Garo) bad kito ki poiwir ba la sah hangne naduh u snem 1971 ki dei ban ioh ia ka Permanent Resident Certificate. Ngi don kam ia u snem ot kyrteng namar ia ki permanent resident jong ka state ym dei ban phah shim ILP lada ki rung bad ki sah ha ka jylla, hynrei kiwei kidei ban shim.

Ngi la ai jingmut ruh ba dei ban pynkhlain bad pynbun ki kyrdop ban pyrkhing ia ki poiwir (Infiltration Check Gate) ha ka jylla ym dei ban don kita facilitation centre ban iarap bad pynsuk ia ki poiwir lyngba ki entry n exit point. Shuh shuh ngi la dawa ba nalor ka tnad pulit (anti infiltration department) kaba ap ha ki border dei ban ai bor ia ki dorbar shong ban register ne buh jingkhein ia ki poiwir ha ki shnong, dei ban don ka hukum  ba ki poiwir kim lah ban shong shnong khlem ka jing aijingbit jong ka shnong, kaba mut nalor ka  ILP ba ioh na ka district task force dei ban ioh sa ka jingbit na ka shnong ha shwa ba ki poiwir ki shong kin sah ne kin bylla ha ka jylla. Ki dorbar shong bad ki VDP kin don ka bor ban kem bad ujor sha ki pulit ia ki poiwir kiba rung bad sah beaiñ kadei kawei ka jingdawa kaba ngi la ban jur bha.

Ngi la pynpaw haman ki por ba ngi ia kynduh ia ka sorkar ba lada kine baroh ki kyndon kim rung  ha kata ka Jing pynkylla ia ka Meghalaya Residential Safety And Security Act ngin nym pdiang iakata ka jing pynkylla.

Balei ngi don kam ia ka ordinance namar ka Assembly kan shong dorbar satang ha u bnai August. Ka Assam kin pyndep ka NRC ha u bnai June ne July. Lada ka BJP ka poi biang ha ka bor ha u bnai May ki lah ban wanrah ka CAB Lyngba ka ordinance. Lada ngi ap haduh u bnai August kamut ki dkhar na Assam da ki lakh bad ki dkhar na Bangladesh da ki klur ki la nang wan shane. Lada ym khot special session dei ban ai  ia ka ILP lyngba ka ordinance bad sa pynlong regularise ha u bnai August namar ngi hap iada noh ia ka jaidbynriew ym long pynslem shuh.

Na ka liang ka kynhun ngi ai khublei ia baroh ki sengbhalang kiba la nang kyrshan shuh ia ka jing dawa ILP. Ngi kyntu ia kiwei de ki sengbhalang ki bym pat kyrshan ILP ba kin sngewbha ban kyrshan lang namar lada baroh ngi dawa ILP ryngkat lang ka sorkar kan sngap bad kan pyntreikam noh kloi ia ka ILP.

Ngi kyntu ruh ia ka sorkar ba lada ka wanrah kano kano ka bill ne ka ordinance​ sngewbha da pyntip bad khot jingialang ia baroh ki sengbhalang ha ka jylla tangba dei ban khot lang ha kajuh ka por bad kajuh ka jaka iabaroh lang ym dei ban khot la ka jong ka jong  khnang ba ngin ioh ai jingmut kiba bha tam kumno yn iada ia ka jaidbynriew na ka jingma .

 

Robertjune Kharjahrin

Chairman, CoMSO