Kyntait ki nongshong shnong ka Moodymmai halor ka rai kyrshan tylli ia u kyrtong MDC ma Jesse Suiam

Syllad | The Rising MeghalayaNovember 1, 2024

Ki nongshong shnong ka Moodymmai, West Jaintia Hills District haka jingiadonlang u Acting Waheh Shnong Moodymmai kila kyntait mardor halor ka jingmih khubor ba ka Dorbar shnong Moodymmai kala rai ban kyrshan tylli ia u MDC ba mynta u Ma Jesse Suiam kum u kyrtong shaka elekshon MDC ka Jaintia Hills Autonomous District Council (JHADC).

U Acting Waheh shnong Ma Molsing Dkhar haba kren pynshai sha ki lad pathai khubor haka 1 tarik Naiwieng, ula ong ba u MDC Jesse Suiam haka 22 tarik Risaw ula phah shithi sha ka Dorbar shnong bad kyrpad ban lum dorbar na ka bynta ban pynsngew paidbah iaki skhim pynroi pynpar ba ula wanrah hapoh ka shnong ka thaw.

Kumta ka dorbar shnong ruh kala sngap ia katei ka jingkyrpad jong u MDC bad haka step 30 tarik Risaw kala lum iaka dorbar step kyrpang tang na ka bynta ban pynsngew iaki skhim pynroi ym na ka bynta ban pynieng kyrtong.

Hynrei ula ong, kaba sngewlyngngoh pat ka long ba na kaliang u Chairman jong ka Dorbar Shnong Moodymmai Ma Emris Ksoo hadien ba la wai ka jingialang dorbar ula pynbna ba ka dorbar shnong Moodymmai ka la rai ban pynieng biang ia u Jesse Suiam ha kane ka Election MDC ka ban wan.

“Kane ka rai kadei ka jingrai shongshit bad rai shimet jong u Chairman shnong ym ka rai jong ka Dorbar shnong”, la pynshai u waheh shnong Ma Molsing Dkhar

Ula pyntip ruh ba kat haduh mynta ka Dorbar Shnong Moodymmmai kam pat pyrkhat satia ban kyrshan ne pynieng ia uno uno u kyrtong namar ym pat thikna ba ka eleshon kan long lano.

Hooid, ngim lah ban len ba u MDC ula pynshai hapoh ka dorbar ia kita ki skhim pynroi ba ula wanrah hapoh ka shnong, hynrei kaba pynkyndit pat ia ngi kum ki nongshong shnong kadei halor ka jingpynmih rai jong u Chairnam shnong, la ong uwei na ki nongshong shnong Ma Kaidor Shullai.

Hapoh ka dorbar la pynsngew iaki skhim katba ka khubor pat sha ka pyrthei ki pynsngew da kumwei, la ong u Ma Shullai bad bynrap ba kane ka long ka jingiuhroit iaka hok jong ki nongshong shnong. Kumta ula kyntu iaka EC shnong ban bishar bha halor kane ka bynta khnang ban lait na kano kano ka jinghuri hapoh shnong poh thaw.

Mih shakhmat ka dorbar shnong Moodymmai ban ai jingkyrshan ia u Jesse Suiam kum u kyrtong MDC