Pynshai ka HANM & EJNC halor ka jingshah kynnoh lute kwai ha Rymbai Sohpeiñ

Syllad | The Rising MeghalayaAugust 29, 2020

Ha kaba iadei bad ka jingmudui kaba la ujor da u George Ros Mingson Manner, nongshong shnong jong ka Trangblang, Elaka Satpator West Jaintia Hills, halor ka jing kynnoh pyrshah ia u Sambormi Lyngdoh, president EJNC bad iaki nongialam jong ka HANM – East Jaintia Hills baki donkti ban lute iaki 2 tylli ki Bolero Pick Up kiba don ia u Registration Number ML 11 4038 & ML 05 U 5059 kiba kit kumba 60 byrni ki kwai haka 19/08 / 2020 kalong tang ka jingpynjah burom iaki nongialam jong ki ar seng.

Halor katei ka jingkynnoh nakaliang ka EJNC, ka pynshai ba haka 19 tarik hadien ka jingioh khubor ba don ki kali Bolero Pick Up kiba kit ia u kwai supari beaiñ ba na Bangladesh ban shallan shaduh Malidor Assam, nakaliang jong u president jong ka EJNC ryngkat ka jingiatreilang bad ki nongialam jong ka HANM – EJHD, kila hiar mardor shaka shnong  Rymbai Sohpeiñ, bad apthap ia kitei ki kali kiba wan lyngba ka shnong Lakroh, Border Bangladesh bad ka India,kiba iaid lyngba ka Shnong Lumpyngngad, Kharkhana ter ter.

Hadien baki nongialam jong ki 2 seng kila ioh ban bat ia kine ki kali kila pynlong iaka jing tohkit iaki driver jong kine ki kali, haka jing tohkit kine ki driver kiba kynthup ia u Ksih bad u Arjen Nongtdu kiba naka shnong Rymbai kila phla baki lakit ia kine ki kwai Supari na Border bangla kiba ki dkhar Bangladesh kila wan pynhap haka dhnong Lakroh.

“Ka HANM bad ka EJNC kala kam ba kine ki nongniah bolero pick up kila phla ruh ba ia kine ki Kwai Supari la aiti ha u Sibil Tariang, Secretary Shnong Lakroh, Elaka Satpator WJHD ban shallan  beaiñ ia kine ki Kwai Supari sha Assam. Na kaliang ki 2 seng kila thmu ban ialam ia kine ki kali sha Ladrymbai Police Outpost hynrei ki kyrpad iaki nongialam jong ki 2seng ban map iaki namar ba kim don jingiadei eiei bad ka jing shallan beaiñ iakine ki kwai Supari kiba wan na Bangladesh, bad kila kit ia kine ki mar tang naka bynta ban kamai jakpoh bad ban pyndap pynbiang iaka ing ka sem ka jong ki.

Haka jing sngewsynei iaka jing kyrpad jong kine ki Driver kiba dei ki paradoh parasnam khamtam hakum kane ka por baki paitbah ki kynduh shibun ki jing naka daw jong ka khlam COVID-19, Ngi la maham tyngeh ia kine ki Driver ba kim dei ban kit shuh ia kum kine mar beaiñ khamtam ha kum kane ka por baka jing shaphriang jong u khniang COVID-19 kadang jur bha, bad ngi la pyllait ruh ia kine ki kali ha katei hi ka sngi, hynrei ngi sngewlyngngoh ban ioh i ba haka 22/08/2020 utei u briew bala kdew kyrteng haneng u la ujor daka FIR pyrshah iaki Nongialam jong ki 2 seng,” la ong Allmiki Ryngkhlem Vice President EJNC – CEC.

Ula ong shuh shuh ba lada ka jing kynnoh jong u Ros Manner kalong kaba shong nongrim balei ka bam por iaki haduh 3 sngi ban ujor iaka FIR, kane ka jingleh jong ki kalong beit thik tang ka jingkwah jong ki ban pynjah burom iaki nongialam jong ki 2seng bad ban tep-eit miaw ia kine ki kam be-aiñ jong ki.

Shuh shuh u Allmiki Ryngkhlem, ula ong ba ha kaba iadei bad ka jing kynnoh jong u Willy Pohphlet Rangbah Shnong Lakroh, Sibil Tariang Secretary Shnong Lakroh baki Nongialam jong ki 2 seng kila pynkulmar Shnong haka 5/08/2020  bad rah ruh iaki tiar pynmynsaw bad tar ruh iaki ID jong ki VDP ka Shnong Lakroh ba ka EJNC kam don jingtip eiei halor katei ka jingjia bad katkum ka FIR bala ujor daki nongialam shnong bad ki VDP jong ka Shnong Lakroh haka 6/08/2020 ha Muktapur Patrolling Post ki Nongialam jong ki 2 seng kim don kyrteng haka FIR kumjuh ka kyrteng jong ka seng ruh kamdon haka FIR, hynrei ngi lyngngoh ban iohi shaki lad pathai khubor baki pynmih iaki kyrteng jong ki nongialam jong ka EJNC, HANM, EJHD.

Halor kane ka EJNC ka dawa naki nongialam shnong jong ka Lakroh ban pynshai halor kane ka jing kynnoh jong ki pyrshah iaki nongialam jong ki 2 seng ryngkat ka sakhi satar kaba biang bad lada kim lah ban pynshisha halor ka jing kynnoh nakaliang ka EJNC kam banse ban ujor daka defamation case pyrshah ia kitei ki nongialam Shnong ki bala pynjah burom iaki nongialam jong ki 2 seng.

Kine ki ar seng kila kyntu iaka tnad Pulit ban pynlong iaka jing tohkit ka bniah ban lap iaka jing shisha kaba sha lyndet.