Pynshai ka Kyrmen Foundation halor ka jingbym ioh jingiarap u nongsiat khnam u Phermeki Salahe

Syllad | The Rising MeghalayaMay 16, 2022

Hadien bala mih ka khubor halor ka jingbym ioh jingiarap scholarship u nongsiat khnam ka East Jaintia Hills District u Phermeki Salahe na ka kynhun u MLA Khliehriat- ka Kyrmen Foundatio, na kaliang ka secretary ka Kyrmen Foundation, ka kong Semi Khongtiang kala pynshai paidbah ba ka dei ka jingbakla ba kila pyllait sha ki khubor paidbah (Social media) ba ka ai iarap scholarship ban kilan bad ban thied iaki tiar ialehkai ba un ioh biang ka lad ban bteng iaka jingialehkai.

Ka Kong Semi kala ong ba ka Foundation ka ieng haka nongrim ban iarap ia u Phermeki kumba la kular.

Katkum ka jingpynshai kaba la ong ba na kaliang ka Kyrmen Foundation hadien bala saphriang ka khubor halor kane kala pynpaw iaka jingsngewkhia, hynrei ka jingthmu kalong ban iarap ia une u samla uba la ialehkai bad mihkhmat iaka District bad ka Jylla sha ki lympung bapher bapher uba la thmu ban sangeh noh na ka kam ialehkai.

“Bun kila kynthoh ym tang ia ki member jong ka Foundation hynrei ruh ia u MLA jong ka Khliehriat Constituency, u Kyrmen Shylla. La bun ki message ba ngi la ioh ha ki social media ba la buh jingkylli ia ka jingshisha ka jingtreikam jong ka Kyrmen Foundation. Na kane ka daw kum ka Foundation ngi kwah ban pynshai paidbah halor ka jingjia baroh,” la ong ka Semi Khongtiang.

Pule | Kam ka Foundation MLA Khliehriat ba ai scholarship ia u nongialehkai Archery, kyntait mardor u samla

Ka Semi kala ong ba ki la ioh jingtip shaphang uwei u khynnah ba la tip kum u Phermeki Salahe uba long u khynnah ialehkai siat khnam bad ka shnong jong u ka dei na Dkhiah West, East Jaintia Hills. Kumta ngi la pyrshang ban contact ia u bad phah wan ia u sha ophis.

Kala ong shuh shuh “Ngi la kynduh ia i Phermeki Salahe ha ka 9 tarik u bnai Iaiong, 2022 ha ka ophis treikam jong ngi ha Lad Rymbai. Ki member jong ka Foundation ki la sngap ia ki jingjynjar ba la shem da ine i samla bad I la iathuh ruh ba I la mut ban iehnoh shwa shipor ia kane ka jingialehkai namar im don tiar. Nga la iathuh ba na ka liang ka Kyrmen Foundation kila rai ban ai jingiarap ia i khnang ba i lah ban iaid shakhmat ha ka jingialehkai jong i. Nga la ong ruh iathuh shwa haiing ia kane ka jingtyrwa jong ka Kyrmen Foundation bad hadien I la ai ka rai ba in iaid shakhmat ban pdiang ia kane ka jingiarap.”

“Kumta ha ka 16 tarik jong u Iaiong, 2022, i samla Phermeki i la kynduh ia i President ka Foundation, bad hangne I President I la ai ktien ia i ba ka Foundation kan iarap ia i da kaba ai ki tiar ialehkai, ka pisa ba Rs. 5000/- man u bnai na ka bynta 3 snem, ka scooty ban pynsuk ia ka leit ka wan jong i bad ruh ia ka madan ba i lah ban practice. I Phermeki I la pdiang ia kane hynrei ia ka Agreement naka bynta jong kane la mut soi ynda la wanphai I President na ka jingsumar ia I bahaiing jong I na Bangalore.” ong shuh shuh ka Kong Semi

Ha ka 5 tarik jong u Jymmang hadien ba ka Foundation ka la tip shaphang ka jingialehkai jong i ha Meghalaya Games, ki member ki la iakren ia i shaphang ki post ban buh ha social media. La phah ruh ia kane ka post sha I Phermeki naka bynta ka jing mynjur ka jong I bad ruh I la ai dak like ia kane ka post ha Facebook. Kane ka post ka long katkum ka jing mynjur jong I Phermeki ia ka jingiarap na ka Foundation.

Hadien kane ha ka 8 tarik jong u Jymmang, ka Foundation ka la ioh ka jingtip ba i hymmen jong I Phermeki I kwah ban kynduh ia ki member ban kren shaphang kata ka post. Namar ka jingsngewthut hapdeng ka jingiakren, la record ia ka jingiakren hapdeng jong ki. Ha kane ka meeting baroh arliang ngi la mynjur ban pynshai shaphang kane ka post ba la pynmih. Hynrei, ha ka sngi ba bud I Phermeki I la ong ia ngi ban delete ia kane ka post ha ka jaka ban pynshai shaphang jong ka. Kumta ha ka 9 tarik Jymmang ngi la pyndam ia baroh ki post ba iadei bad kane. Ka Foundation ka la kren ia I Phermeki hi naduh nyngkong kumta ngi la sngap ia ka jingkwah ka jong I hi bad leh ia kaei ba I la ong ia ngi, la ong ka Kong Semi.

Shuh shuh kala ong ngi la ioh jingtip ba I hymmen jong I Phermeki I la file FIR pyrshah ia ka Foundation ha kaba iadei bad kane ka post ha ka 12 tarik jong u Jymmang, 2022. Ngi la shah summon ha Police Station ha ka 13 tarik Jymmang, 2022 bad ha kane ka jingiakynduh la rai ba ki member kin kynduh ia i Phermiki markhmat ha ka 16 tarik u Jymmang ha Police Station. Hynrei ka sngi hashwa ka jingiakynduh, kata ka 15 tarik la mih ka video jong I Phermeki haki khubor.

Na ka liang jong ka Foundation ngi kwah ban pan map na I Phermeki Salahe bad ki bahaiing hasem jong I na ka bynta kano kano ka jingbakla bad ka jingpynsngewsih ka jong ngi ia ki. Ngi la iohi ia ka jingtbit ka jong I Phermeki ha ka jingialehkai ka jong i bad kumta ngi la kwah ban iarap ia I ba I lah ban ialeh haduh ban da poi sha ka thong jong i. Ka jingthmu ka jong ka post jong ngi kam dei ban pynjah burom ia I samla Phermeki hynrei ban ai mynsiem ia kiwei pat ki nongialehkai ban wan shakhmat.

Kum ka Foundation ka thong ka jong ngi ka long ban iarap bad ai ka jingkyrshan ia kito ba donkam ia ka. Ka Foundation ka la rai ban kyrshan ia I Phermiki Salahe bad mynta ruh ngi ieng ha kata ka juh ka nongrim bad ngi kloi ban iarap ia I kumba ngi la kular ban leh.