Pynshai ka shnong halor ka dawa sospon ia ki nongialam shnong ka Bakur na ka JHADC

Syllad | The Rising MeghalayaAugust 16, 2020

Ha kine ki khyndiat sngi, Ka Executive Committee jong ka shnong Bakur hadien bala mih khubor halor ka jingdawa ban suspon ia u Headman/Waheh Shnong, Secretary bad ka Executive Committee jong ka shnong Bakur da ka kynhun ba ialam da u Lop Stevenson Khonglah halor ka jingkynnoh ba ki don bynta ha ka kam ban pynmynsaw ia ka longkmie ha ka shnong Bakur.

Ka Executive Committee jong ka shnong Bakur kaba long ha ka sngi 13.08.2020 ha ophis shnong, kala shim iaka rai ban kyrpad ia u CEM, u EM in charge political bad ki ophisar ka JHADC  ban nym pdiang iaka jingdawa sospon u Lop Stevenson Khonglah bad ki kato katne ngut ia u rangbah shnong bad ka EC Bakur namar ka jingkynnoh jong kine ki briew ka long kaba lamler bad bym don nongrim. Shuh shuh, ia kane ka  kam kala poi sha ka Court kumta ka dei ka kam jong ka court  ba don burom ban shim iaka rai.

Halor ka jingkynthoh u Lop Stevenson bad ki kato katne ngut ba kiba la don case kim lah ban pyniaid iaki kam shnong, kane kadei kaba bakla bad ka pyni ba kine ki briew ki pat shai satia ia ka ain namar kumba long mynta hi ka ain jong ka district council kam khang satia ia u rangbah shnong ban long rangbah shnong tang namar ba u don case. Ka District council ha por ba ka shna ia ka ain rangbah shnong lehse ka lah iohi jngai ba kan sa don ka jingshim kabu ban shuh file case lamler ia ki Rangbah shnong kumba jia mynta ha ka shnong Bakur bad namar kane ka khlem khang satia ia ki Rangbah shnong ban long Rangbah shnong wat lada ki don case.  Kum ban shuh pynshai ba kam dei ka sien ba nyngkong ba ki rangbah shnong kin don case bad ki don kiwei ruh ki rangbah shnong kiba don case hynrei ka kam rangbah shnong ka iaid beit bad ka kam case ruh ka iaid hynrei  lada jia ba rai pynrem ka court te ka Dorbar shnong ka lah ban pynkhein ia u rangbah shnong.

Halor ka jing ong u Lop Stevenson bad ki kato katne ba u waheh shnong u pyniaid marwei iaki kam shnong kane ka long kaba bakla bad u la shu kren tang ban pynjah burom ia kiwei namar ki don ki record haka register jong ka shnong ba pyni ba ia baroh ki kam shnong lah pyniaid da ka Executive committee.

Ka jingkam  jong u Lop Stevenson ba ki kato katne ba ki don 30 tylli ki iing kiba kyrshan ia ki, na ka liang ka EC ka kwah ban pynshai ba ka Shnong Bakur ka don palat 300 tylli  ki iing briew bad baroh  kine ki ai jingkyrshan ia u rangbah shnong bad iaka EC baroh kawei. Shuh shuh, ka jingkynnoh ba lah don kti da ki heh ki hain ban iada ia u waheh shnong kane ka long kaba khlem nongrim namar u waheh shnong u lah iaid lynti kat kum ka kyndon ain ban ioh ia ka bail. 

Khatduh ka EC jongka shnong Bakur ka kwah ban pynpaw ba imat don ka jingthmu sha lyndet ban pynkhyllem iaka kam rangbah shnong  bad ia ka EC jong ka Dorbar shnong Bakur namar ka EC shnong ha ka jingialam jong u waheh shnong ka lah leh ia bun ki kam hapoh shnong kynthup ban pynsangeh ia ka jingdie kyiad beain, ka jingdih buiad hapoh shnong, ka jing iadie ia thied bad ka Bangladesh ha kane ka por Corona Virus, bad kiwei kiwei de bad kine baroh ki lah pynduh nong ia ki khyndiat ngut ki briew hynrei ka wanrah pat ka jingbha ia ka shnong hi baroh kawei.

Wat hapdeng kine ki jingpynwit, Ka EC hapoh ka jingialam jong u waheh shnong kan iai leh ia ki kam ba bha kat kum ba shah ka ain na ka bynta ka bha ka miat ki nongshong shnong jong ka shnong Bakur bad ka EC ka kyrpad ia ki paidbah ban nym ngeit ia ki jingkynnoh lamler.

Ia une u kyrwoh la phah da u waheh shnong Daniel Khongsit