Pynshai ki 2 Shnong ba khlem ioh jingiarap khaw naka WJNC

Syllad | The Rising MeghalayaApril 11, 2020

Ki arngut ki Waheh Shnong jong ki artylli ki shnong, kata ka Shnong Iooksi bad ka  Shnong Khonshnong kila pynshai paidbah halor ka jingmih khubor haka 5 tarik u Iaiong (April)  kaba ong ba kadon ka jingsamkhaw daka Seng West Jaintia National Council ( WJNC) ha kitei ki ar tylli ki shnong.

Kitei ki arngut ki Waheh Shnong hadien ba kila iohi iakatei ka khubor kila wad jingtip naki nongshong shnong ioh lehse ba don ki nongshong shnong kiba ioh shisha ia uta u khaw kumba la mih haki khubor, hynrei haka jingwad jingtip la lap ba ymdon wat tang uwei ruh u nongshong shnong uba ioh ia utei u khaw . 

Katkum ka khubor ba la mih la ong ba katei ka Seng WJNC hapoh ka jingialam u Kitborlang Dkhar President Ka WJNC (CEC ) ki la leit sam khaw sha kiba duk ba shitom mar 5 kilo sha kumba 10 tylli ki longiing ha Shnong Iooksi, bad sha 13 tylli ki longiing ha shnong Khonshnong.

Ki Nongialam shnong ki la kwah ban pynshai paidbah khamtam sha ki para nongshong shnong ba ym shym don kum katei ka jingsam khaw da katei ka Seng hapoh ka Shnong bad hakajuh ka por la maham jur ruh iakatei ka Seng ba nangne shakhmat kam dei shuh ban shu pynmih khubor thala ia ka kyrteng shnong lada ym dei ka jingshishaa bad sa kawei nangne shakhmat lada ki mut ban leh iakino kino ki kam haka shnong kidei ban ai jingtip lem sha ki Waheh Shnong ka shnong ruh.

“Kane ka jingpynmih khubor jong katei ka Seng ba ka Sam khaw haki shnong jong ngi khlem da don kano kano pat ka jingsam khaw ka pynlong ia ngi kum ki nongialam shnong ban shah suba sniew haki Nongshong shnong, namar ym don tang uwei ruh u nong shong shnong uba ioh ia uta u khaw” la ong kitei ki Waheh Shnong jong ki ar shnong u Ma Sumarhok Passah Waheh Shnong Khonshnong bad Ma C Tangliang Waheh Shnong Iooksi .