Pynshai paidbah halor ka jingkongsan ka jingai snam ha Lyngiong

Syllad | The Rising MeghalayaJune 28, 2020

Ka Ai Jingim Voluntary Blood Donors Organisation, Shillong ha ka jingiatreilang ryngkat ka Regional Blood Bank, Pasture Institute, Shillong bad ka Dorbar Shnong Thainthynroh, Lyngiong Lyngdohship ka la pynlong ia ka jinghikai ban pynshai halor ka jingdonkam ban ai snam ei ha ka 26 tarik u Jylliew, 2020 ha Seventh Day Adventist English Secondary School, Lyngiong. Ka jingai jingpynshai ka bud ryntih ruh ia ki kyndon jong ka jingiajngai ne social distancing iwei ia iwei da kaba iashong jngai ha ryngkat ka jingpyndonkam ia ki jingdeng iada durkhmat ne ki masks bad ki jingpynkhuid kti ne hand sanitizer katkum ki kyndon ka tnat ka koit ka khiah da kaba don ruh tang khyndiat ngut ha katei ka jingpynshai namar ki kyndon jong ka jingkhang dam. 

La ioh ia ka jingpynshai kaba bniah na i  Dr C Budnah incharge ka Regional Blood Bank Regional Pasture Institute, Shillong, iba la pynshai ba ka jingai snam kam don jingma eiei kumba don kiba ju tieng hynrei ka iarap ban pynkhuid ia ka snam jakhlia na ka met.  Shuh shuh i la batai ba kiba don ha ka met kaba shait ba khlain hapdeng ka rta ba 18 haduh 65 snem ki lah ban ai.

 I Dr B Lato na ka National Health Mission ruh i la batai ba ka sorkar ka buh ia ka thong ba dei ban don ka mon sngewbha ban ai snam sha ka Regional Blood Bank khnang ban ioh pyndonkam ha kano kano ka por ba ki nongpang ki donkam ym ban shu bujli tang lada donkam na bynta  kiba ha iing ha sem ne ki paralok.  

U bah Andreas Marwein u Secretary ka Seng u la batai ia ka jingshakri ka seng na ka por sha ka por ban ai snam sha bun ki nongpang kiba donkam snam bad pynshlur ia kiwei ruh kumjuh ban mih  shakhmat bad don ka  mynsiem kaba shlur khlem kano kano ka jingsheptieng. 

U Ma Hamphrey L Ryntathiang u Lyngdoh ka Hima Lyngiong Lyngdohship u la long u Kongsan ha katei ka lympung ai jinghikai bad jingpynshai u ong ba ka kam ai snam ka long kaba donkam ban iarap ia ki para mynsiem kiba donkam snam ha kano ka por bad ym  dei satia ban don ka jingtieng bad pynpaw ruh u la ju ai snam na ka por sha ka por. 

Kiwei kiwei pat kiba la kren ki kynthup ia u Bah Banraplang Kharbteng u Rangbah Shnong Thainthynroh, u Bah Staising Kharbteng bad u Bah Ditral Marbaniang Secretary ka Hima Lyngiong Lyngdohship uba la pyniaid ruh ia ka jingialang ha ka jingiadon ryngkat kiwei kiwei ki  Rangbah Shnong, Myntri B. Swer  bad ki nongshong shnong . 

Ka jinghikai ka long kaba jop ha kaba ki nongshong shnong ki la mih shakhmat ban ai snam ei kynthup ia u Lyngdoh ka Hima, U Rangbah Shnong Thainthynroh bad kiwei kiwei ha ryngkat ki dkhot ka seng.