Pynshai paidbah Honda na ka bynta ka jingshngaiñ ha ki lynti syngkien

Syllad | The Rising MeghalayaAugust 2, 2023

Ka Honda Motorcycle & Scooter India (HMSI) ka la pynlong ia ka jingialap paidbah halor ka jingshngain ha ki lynti syngkien ïa kaba la tip kum ka ‘National Road Safety Awareness Campaign’ ha Umden, Meghalaya.

Ka jingpynlong ia kane ka jingialap paidbah ka thmu ban pynsngewthuh ba donkam ban wanrah ia ka jingshngain ha kaba niah ia ki kali ar shaka bad ïa kane ka jinghikai la ai sha palat 1800 ngut ki khynnah skul bad ki nonghikai.

Kane ka jingai jinghikai ba ar sngi lynter ia kaba la pynlong ha St. Joseph HS School ha Umden kadei kaba la ai na ka bynta ban iahap bad ka rta jong ki nongshah hikai khnang ba yn lah ban pynsaphriang ia ka jingshngain ha ki lynti syngkien.

Ka jingthmu jong kane ka long ruh ban wanrah ka jingmlien ha ki briew ba kan don ka jingshngain ha ba niah ia ki kali ar shaka ha India bad ban kyntiew ruh ia ka rukom niah kali ha ka rukom kaba shngain.                            

Kane a prokram ka kynthup ia ki rukom ai jinghikai ba la shna pynwandur bha, kaba hikai ruh lyngba ka jingai ka jingpyrshang ha ki virtual riding simulator, ki jingiakren bad ai jingmut mar kylliang da kaba pyndonkam ia ka Kiken Yosoku Training (KYT), bad na ka bynta kito kiba la niah lypa ia ki ar shaka ba kin nang kham pyntbit shuh shuh ia ki sap jong ki lyngba ka jingniah suki bad niah ruh ha ki lynti kiba rit.

Ka Honda man la ka sngi ka pynlong ruh ia ki jingai jinghikai da kaba pynlong ia ki jingialehkai halor ka jingshngain ha ki lynti syngkien bad pynlong ruh ia ki quiz, ban pyntikna ba ki khynnah kin sngewthuh bad shemphang shaphang halor ki jingshngain ha ki lynti syngkien.                          

Haba kren shaphang ka jingtrei jong ka HMSI ban pynrung ia kane ka jingsngewthuh ba donkam ban pynlong ia ka India kaba lait na ki jingiatyngkhuh kali, U Vinay Dhingra – Senior Director, HR, Admin, IT & Corporate Affairs, Honda Motorcycle & Scooter India u ong, “Ka jinghikai shaphang ka jingshngain ha surok ka long kaba donkam na ka bynta ban don ka jingmut jingpyrkhat jong ki briew shaphang ka jingshngain ha ki lynti syngkien.

Shuh shuh u la ong ruh ba lyngba kane ka jingialap paidbah, ka jingthmu jong ngi ka long ban pynrung ha ka jignsngewthuh jong ki briew shaphang ka jingshngain ha ki lynti syngkien hapdeng ki nongniah ar shaka kiba dang thymmai bad kumjuh ruh ban iarap ia ki ban sngewthuh shaphang kumno ban pyndonkam ia ki lynti syngkien ha ka rukom kaba shngain.