Pynshai u Bah Ardent ia ka jingkren pyrshah ia ki lad pathai khubor 

Syllad | The Rising MeghalayaOctober 24, 2023

Na ka liang u nongialam ka Voice of the People Party (VPP), uba dei ruh u MLA napoh Nongkrem u Bah Ardent Miller Basaiawmoit u la pynshai ha kaba iadei bad ka jingkren ka jong u ia ki lad pathai khubor ha kawei na ki jingialang kaba la long ha Pynursla da kaba pynpaw ba na ka liang ka Meghalaya Editors’ and Publishers’ Association (MEPA) ruh ki la kloi ban iakynduh bad iakren halor kane ka bynta.

Kane ka jingpynshai jong u Bah Ardent ka la wan long ruh hadien ba na ka liang ka  Shillong Press Club (SPC) ka la pynpaw ka jingsngewsih bad bad dawa ba u dei ban pan map halor kane ka jingkren ka jong u.

U la ong ba ka jingiakynduh bad ka MEPA ka long kaba sngewtynnad bad seisoh, ha kaba u la pynshai ba ka jingkren ka jong u ha katei ka jingialang ha Pynursla ka dei ka jingthmu ban pynshai sha ki paidbah bad ba kim don kano kano ka jingthmu ban kren pyrshah iano iano ne ban kdew kti ia kano kano ka channel, hynrei ki kwah ban pynshai sha ki paidbah namar ki kwah ban wanrah ka jingkylla.

U la ong ruh ba ngi hap ban shim ia kine ki sienjam namar ngi sngewthuh ba ka jingiaid lynti ka long kaba eh ha kaba ngi hap ban ialeh pyrshah ia ka sorkar ia ki seng kiba don ha ka sorkar bad ngi sngew ba ka dei ka kamram ka jong ngi ban pynshai sha ki paidbah ba kin long kiba stad bad ba sian bad ban nang ban bishar ia ki khubor kiba shisha bad ki bym shisha.

“Ka jingkren ka jong nga ka long ban pynshai ba ym tang ha kiwei kiwei ki ri ka pyrthei lane ha India bad hangne ha jylla ki don kita ki paid news bad ki fake news, kaba mut ba ki paidbah kin hap ban sngewthuh. Ngi kwah ban hikai ia ki, bad nga da ong ruh ba ha kiwei kiwei ki jylla ki hap ban siew da ka pisa ban pynmih khubor, ka kyntien kaba nga pynkynmaw bad ai ba kan da long kumta bad ai ba ki paidbah kin long kiba stad, ngim lah ban ong ba ki khubor kiba mih kin shu kut noh kumto. Kumta ngi kwah ba ki paidbah kin ym shah ialam bakla halor ki khubor ki bym shisha,” ong u Bah Ardent.

Nalor kata u la ong ruh “Ngi sngewthuh ba ki party kiba don ha ka liang ka sorkar lane wat ka sorkar ki phaikhmat ia ka jingiaid lynti ka jong ngi, bad da ka jingkylla jong ka por nga ngeit ba kiba sngap ha kato ka sngi ngi khlem kynthoh pyrshah iano iano, ngi khlem ong baroh kita ki lad pathai khubor, namar mynta ym dei tang kito ki khubor kiba ju don mynshuwa hynrei mynta leilei khamtam kila mih sa ki private youtuber namar mano mano ki lah ban lum khubor bad pyllait khubor, te ka khubor kaba kumno ka leit sha u paidbah.”

Kumta u la ong ba ka dei ka kamram jong ngi ban hikai bad pynsngewthuh bad pynshai sha u paidbah, bad lada shim ia kane ka jingkren ka jong nga na ka bynta ban iatei kan long ruh kaei kaei kaba bha, lada ki nongialam kiba don ha ka Press club bad ki lad pathai khubor ki shim ia ka na ka bynta ban tei.

“Nga ngeit ba kin ym don mano kano kiba don ha ki lad pathai khubor ki ban ong ba em ha Meghalaya kam don kum kata, phim lah ban nujor ia ka Meghalaya bad kiwei ki jylla, lada ki la don ha kiwei ki ri ka pyrthei lada don ha ri India hangne ruh kan poi ka por ba ka sorkar kan pyndonkam ia ka bor bad ki lad pathai khubor kin ym nud shuh ban thoh pyrshah ioh kin duh ia lad jingiarap na ka sorkar ha ka rukom jong ki advertisement ne jingpynbna paidbah kiba long ka jingkyrshan ia ka jingtrei ka jong ki,” ong utei u nongialam ka VPP.

Shuh shuh u la ong ba kan poi ka por ba kita ki bym thoh pyrshah ia ka sorkar ki bym kren pyrshah sorkar kin kham ioh advertisement bad jingkyrshan, bad kane ka jingkren jong ngi kan pynpyrkhat wat ia ka sorkar ba ngi ki paidbah ngi long kiba stad ban bishar bad ngin peit lada ka long na ka liang ka sorkar ne na ka linag jongno jongngo ban ialam bakla bad ba ki lad pathai khubor kin khmih ba kidei ban long kiba tei bad ym ki ban ialam bakla.

U la ong ruh, “Ki lad pathai khubor ruh ki dei ban peit bha bad pyrkhing khnang ba ki khubor kiba ki ai nangne shakhmat ki dei ban long kiba tei namar ki don ia ka bynta ban aijingtip sha ki paidbah namar ym tang ma ngi ki nongthaw ain ki ba lah ban pynbha ia ki jingmut jingpyrkhat jong ki paidbah, hynrei ki lad pathai khubor ki don ia ka bynta kaba khraw, kumta ngi la ioh ban pynpaw sha ka MEPA ba ngim don kano kano ka jingthmu ban thew pyrshah iano iano lane ban kdew kti hynrei ai ba ba kaei kaei kaba mih na kane ka jingkren kan pynpyrkhat ia ngi ba ngin ym ailad ia kiba kum kita ki khubor kiba ialam bakla ba kin mih ha ka jylla.”