Pynshai u DC halor ka jingsaphriang ka video ba shah ktahkti u draibar ha u PSO

Syllad | The Rising MeghalayaAugust 29, 2023

Ha kaba iadei bad ka jingsaphriang ka video kaba pyni ia u PSO jong u Deputy Commissioner East Jaintia Hills District uba la ktah kti ia u nongniah kali, na ka liang u DC ula pynshai ba kane kam shym la long kumba la sakhi ha kane ka video.

U la ong ruh ba khnang ban lait na ki jingartatien bad ialam bakla halor kane ka video kaba la jia ha ka surok National Highway 6 hajan ka shnong Wahiajer mynta ka sngi ba Ar, u DC u la ong ba u la don ha ka lynti ban leit shapoh Lumshnong ban iashim bynta ha ka prokram jong ka skul Divine Words Secondary School, Lumshnong bad ruh na ka bynta ka jingialang bad u Project Director, DRDA, EJHD, Block Development Officer, Lumshnong C&RD Block bad baroh ki Gram Sevak bad BTA jong ka block.

Hynrei, u la ong ba ka la don ka jingdheng kali kaba jur ha kane ka surok NH6 naduh Thangskai haduh Wahiajer namar ka jingdon jong ki katto katne ki kali kiba sniew ha ki bun jaka.

U la ong ruh ba u draibar jong u, u la ai dak ne signal khnang ban ioh ban iaid shakhmat, hynrei u la ngat ha ka jingshah tim shah tla ha uwei u draibar jong ka kali Mahindra Camper Pick up kaba don ia u nombor ML 11 4554 kaba iaid nakhmat. Hynrei, na ka liang u draibar jong u um shym la pynsngap satia, hynrei u la bteng ban ai signal hynrei kane ka kali kam shym la ailad satia.

Hynrei, katba u PSO jong u, u dang pyniaid ia ki kali na ka liang jong u (DC) u la kyntu ia u draibar ba un kyrpad ia utei u nongniah Mahindra ba un pyllait lynti. Hynrei, dei ia kaba kum kane ka por la shem ba une u nongniah jong katei ka kali uba don hapdeng ka jingbuaid u la kren khor da kaba tyngeh.

Kumta ka la don ka jingpyrshang ban knieh ia u shabi kali khnang ban khanglad ia utei u draibar ba un jam shakhmat, hynrei une u draibar u la kyntait ha ryngkat ka jingpyni bor. Kumta na ka liang u PSO hadien ba u la wan poi ha kane ka jaka bad iohi ia kane ka jingpyni bor bad ka jingkren khor jong une u draibar u la wan ban tuklar ban iada ia u (DC) namar ka dei ka kamram kaba la bynshet ha u ban leh ha kaba u la hap ruh ban pyni bor khyndiat pyrshah ia utei u draibar.

Hynrei, na ka liang u DC u la ong ba ma u ryngkat bad une u PSO jong u ki la shah kynthoh pynban ha ki briew ki bym lah ban ithuh kiba la pynmih da ki ktien khlem akor, kata wat hadien ba ki la pyrshang ban pynshai halor kane ka jingjia baroh.

Nalor kata kine ki briew ki la pyrshang ruh ban khang lynti ia ka kali jong ki, hynrei dei tad hadien ka jingwan tuklar jong ki trai shnong ba la lah ban pyllait suk ia ka kali jong ki ba kan iaid shakhmat.

Hadien ia utei u draibar ka Mahindra la rah noh ban leh ia ka medical test ha kaba la sakhi ba u la dih buaid bad ba um biang shuh ban niah ia ka kali ha katei ka por. Kumta na ka liang u DC u la ong ba ka jingsaphriang jong katei ka video ka long ka bym shonghok bad kaba dei ban shim ia ki jingpynshitom lem kumta kan buh ka jingbym shngain ia kiwei pat kiba iaid lynti na kane ka surok.