Pynshai u SP ka SWGH ia ka jaka ba la mudui ejahar halor ka jingjia kam leh thok

Syllad | The Rising MeghalayaFebruary 28, 2025

Haba jubab halor ki jingmih khubor ba dang shen lyngba ki lad pathai khubor ha kaba iadei bad ka kam leh thok jong uwei u briew da kaba kam ialade kum u doktor hapoh Ampati Civil Hospital, u Superintendent of Police (SP) ka South West Garo Hills, u Vikash Kumar u la pynmih ia ka jingpynshai ha kaba iadei bad ka jaka ha kaba la mudui ia ka ejahar.

Kane ka jingjia ba la kdew ka dei halor ka jingmudui ejahar ba la mudui da u nongtrei kam bhalang u Greneth M Sangma pyrshah ia uwei u briew uba kyrteng u Hirak Sangma ia uba la kynnoh ba ula thoh la shukor ia ki briew da kaba kam ba u dei u doktor bad tyrwa kam ia ki ha ki Primary Health Centres (PHC) bapher bapher ha Rilum Garo.

Katto katne ki lad pathai khubor ki la iathuh ba ia katei ka jingmudui ejahar la ujor hapoh Ampati Police Station. Hynrei na ka liang u SP u la pynshai ba katkum ka jingmudui ejahar kaba dei hok, ia kane ka ejahar kaba 26 tarik Rymphang 2025 ha ka jingshisha la register hapoh Baghmara Police Station, South Garo Hills, ym ha Ampati Police Station. 

Na ka liang ki bor ka ain ki kyntu ia ki lad pathai khubor ba ki dei ban pynshisha ia ki jingtip hashwa ba kin pynmih ia ki khubor khnang ban pynthikna ia ka jingshisha hashwa ban pyllait sha ki paidbah.

Nalor kata ka jingtohkit kaba bniah ha kaba iadei bad kane ka kam thok ka dang iaid shakhmat bad yn shim ia ki sienjam katkum ka ain hadien ba la pynshong nongrim katkum na ka jinglapdien.