Pynshai u Waheh Shnong Wahiajer Narpuh halor ka NOC bad public hearing ka karkhana dewbilat

Syllad | The Rising MeghalayaAugust 22, 2023

U Waheh Shnong Wahiajer Narpuh ma Sibren Sumer ha u kyrwoh ba ula phah ula ong ba khnang ba ki paidbah kin nym sngewthuh bakla halor ka jingkynthoh pyrshah ia u kum u Waheh Shnong Wahiajer Narpuh halor ka public hearing ka Meghalaya Cement Ltd.

Ka khubor kaba la mih ha ka 18th August, 2023, ka Wahiajer Narpuh Social & Sport Club bad ki nongshong shnong ka la pynpaw ba ka pyrshah ia ka Public Hearing jong ka Meghalaya Cement Ltd ka ban long ha ka 24-08-2023, la kynnoh ba la ai NOC da u Waheh Shnong Wahiajer Narpuh, east Jaintia Hills District.

Kane ka jingkynnoh jong u Lami Mukhim bad u Cheerful Surong kiba long u President bad u Secretary jong kane ka Club ka long kaba khlem nongrim bad kaba ialam bakla haduh katta katta khamtam ia ki paidbah ki bym tip ei ei shaphang ka Meghalaya Cement limited, Thangskai.

Ka Meghalaya Cement Limited ka dei ka Karkhana pynmih dewbilat kaba la don 20 snem mynta. La ai NOC ia ka da ka Synjuk ki Lai Shnong- Thangskai Chiehruphi bad Wahiajer Narpuh naduh u snem 2003. U Waheh Shnong Wahiajer Narpuh um lah ban ai NOC marwei namar ka MCL ka hap hapoh ki Lai shnong

Katkum ka jingiaid jong ka por, ka Meghalaya Cement Ltd ka la kwah ban pynheh ia ka jingpynmih dewbilat bad Clinker. La pdiang bad mynjur ia kane ka jingpan ka Meghalaya Cement ltd bad la ai NOC baroh lai Shnong hadien ba ka Company ka la mynjur ban soi ia ka Agreement na ka bynta ka jingmyntoi ki paidbah jong ki Lai Shnong. Kane ka jingpynheh ia ka MCL ka dei beit tang ia ka jingpynmih cement bad clinker bad ym donkam ban thied jaka thymmai na ka bynta kane ka jingthmu.

Ha ka jingiadei bad ka tdem bad u pum pum ka MCL ka la jan dep artad ban shna ia ka Waste Heat Recovery System ban iada ia ka tdem lane pum pum ban poi sha ki shnong ki thaw

Kumta ka public hearing ka ban pynlong ha ka 24-08-2023 da ka Meghalaya State Pollution Control Board, na ka liang ka synjuk Lai Shnong Thangskai Chiehruphi bad Wahiajer Narpuh ka la rai ban kyrshan tyngeh ha ryngkat ka jingkyrshan lang u Dolloi, ki paidbah bad Waheh Shnong na ka Elaka Narpuh

Ka jingkynthoh ia u Waheh Shnong ka Wahiajer Narpuh ka long tang ka jingpynthohbria bad la kyrpad ia ka Wahiajer Narpuh Social & sport Club ban da pyrkhat bha ha shuwa ban pynbudnam iano iano.