Pynshlur ka SAFF ia ki dkhot ban kyrshan ia ka Sorkar ha ka jingiakhun pyrshah ia u drok

Syllad | The Rising MeghalayaFebruary 24, 2025

Ka Shillong All Faiths Forum (SAFF) ka la rai ban pynshlur ia la ki jong ki dkhot ba kin ai ka jingkyrshan kaba pura ia ka Sorkar Jylla ha ka jingiakhun thma pyrshah ia u drok.

Ia kane ka rai la shim ha ka General Body Meeting kaba la long ha Umshyrpi college, Shillong.

Ka jingialang ka la mynjur ruh ia ki nongkitkam bathymmai jong ka SAFF na ka bynta kane ka samoi treikam, kiba kynthup ia u President Bishop P Lyngdoh, Vice President Naba Bhattacharjee, General Secretary Noor Nongrum, Assistant General Secretary Arup Barua, Treasurer Jasbir Singh bad u Rev Kharkongor kum u Media Assistant.

Ka SAFF ka phah ruh ka jingsngewnguh ia u Myntri ka Tnad Social Welfare bad ka kynhun jong u halor ka jingialang ba dang shen bad ki nongialam NIam ha  ka Nongbah.

Haba pynpaw ia ka jingshaniah ha ka Project DREAM jong ka Tnad Social Welfare hapoh ka jingialam u Mission Director u Bah Francis G Kharshiing, ki dkhot ka SAFF lem bad ki nongialam na kiwei pat ki kynhun Niam ki la kular ia ka sorkar ba kin ai ka jingkyrshan kaba pura halor kane ka jingpyrshang ban rat dyngkhong ia u drok na lem bad kiwei pat ki jingsniew na kane ka jylla kiba la kynrei bha mynta ha ka imlang ka sahlang ka jong ngi,” ong u General Secretary ka SAFF u Bah Noor Nongrum.

“Ka SAFF ka kyrpad ruh ia baroh ki dkhot bad ki unit jong ka ba kin shim ia ki sienjam ban wad ia ki riew shemphang bad ka jingkyrshan psia na ka sorkar hapoh jong ka Drug Rehabilitation, Elimination and Action Mission (DREAM) Project na ka bynta ban pynlong ia ki prokram bapher bapher ha ki jaka jong ki bad ruh ban iasyllok na ka por sha ka por bad la ki jong ki para bangeit,” u la ong da kaba bynrap ba ka SAFF kan iarap ban btin lynti bad kyrshan ia ki dkhot ha kane ka jingpyrshang jong ki bad ba kin long shibynta jong kane ka prokram.