Pynshlur ri sniang u Director ka ICAR NRC Guwahati haka jingialang ha Ladrymbai

Syllad | The Rising MeghalayaApril 9, 2025

U Director ICAR-NRC on Pigs Rani Guwahati, Assam Dr. VV Gupta ula kyntu iaki nongrep bad nongri jingri ka thain East Jaintia Hills District ban shim iaka kam ri sniang kum kawei na ka kam ban kyntiew iaka ioh ka kot ki longiing longsem ka thain.

U Dr Gupta ula kyntu haka jingialang phylliew jingmut jong ki nongrep bad nongri jingri kaba tip kum ka Research Extension-Farmers Interface Meeting and Input Distribution Program kaba hap hapoh ka AICRP on Pigs, NRCP & Tribal Sub Plan.

Iaka jingialang la pyniaid da ka ICAR-National Research Centre on Pigs Rani Guwahati, Assam ryngkat ka jingiatreilang ka KVK Jaintia Hills bad ATMA East Jaintia Hills District kaba la long ha phyllaw ka East Side Inn, Ladrymbai Bypass Jalyiah haka 8 tarik Iaiong.

Ula ong shuh shuh ka sorkar kam shym la kwah iaki nongrep ban ri bad bam hi, bad im, hynrei ka jingthmu hi ka long ban ai jinghikai iaki ha kaba kin lah ban ri na ka bynta jong ki bad na ka bynta jong kiwei ruh bad suki suki lyngba ka jingstad jingshemphang ki sa lah ban pynbiang bad pyndap sha kiwei pat ki bynta jong ka ri.

Ha kaba iadei bad ka jingpang sniang ne African Swine Fever, ula ong namar bym don ki dawai iada bun ki sniang ki iap pathar haki bynta bapher bapher jong ka thain shatei lammihngi khamtam ha jylla Mizoram, katto katne ki bynta jong ka Assam kumjuh ha Meghalaya bad ki briew kiba nabar kum na Punjab, Haryana, Andhra Pradesh bad Tamil Nadu ki pynbiang bun bah ki sniang shaka thain bad ha u snem uba la dep ka jingioh kamai jong ki ka long 2 hajar klur tyngka.

U Dr. Gupta ula pynshlur ruh ia kino kino ki nongrep bad nongri jingri kiba kwah ban kyntiew iaka kam ri jingri ba kin wan sha ka National Research Centre kaba don ha nongbah Guwahati na ka bynta ba kin ioh iaki jinghikai kiba janai halor ka kam ri sniang nalor kiwei kiwei ki lad jingiarap haba iadei bad ka rep ka riang bad ki buit ban iada na ki jingpang sniang.

Shwa kane u Dr. R Suchiang Subject Matter Speciallist (AH&Vety) KVK Jaintia Hills ula ong hapoh ka Jylla ka jingiapher hapdeng ka jingpynmih bad ka jingdawa ka long kaba pher bha bak ly bak bad kumba la iatiplang ba bun ki nongshong shnong kidei kiba bam doh bad u shning u long barabor ka bynta kaba kongsan jong kano kano ka jinglehkmen.

Ha kane ka sngi la ioh ruh ka jingkren na ka symbud kongsan ka Kong JU Kharpuri Additional Deputy Commissioner, East Jaintia Hills District, ka Kong L Lakiang District Agriculture Officer, kaba khmih ruh iaka tnad District Horticulture Offcer, bad Project Director ATMA East Jaintia Hills District, bad na u Dr. PJ Das Principal Scientist ICAR-NRC on Pigs Rani, Guwahati Assam ula ai ka jingbatai bniah halor ka phang Scientific Piggery Farming.

Hadien ka jingialang la sam iaki jingbam sniang, grinder, ki borti sha ki nongrep nalor kiwei kiwei ki lad jingiarap.