Pynskhem ka JNC iaki nongkitkam ba thymmai ka Jalaphet Circle

Syllad | The Rising MeghalayaJanuary 23, 2024

Ka Jaiñtia National Council (JNC) haka 22 tarik Kyllalyngkot kala jied bad pynskhem iaki nongkitkam ba thymmai ka Jalaphet Circle haka jingialang bala pynlong ha ïing club ha Loom Sashram Jalaphet, East Jaintia Hills District.

Iaka jingialang la pyniaid da u Assistant Secretary bah Allmiki Ryngkhlem bad ka jingpdiang burom iaki nongialam bad dkhot ka Jalaphet Circle lah ioh na u Diamon Bareh (GS Khliehriat Circle) ha ryngkat ka jingiadon lang ki nongialam CEC, President Sambormi Lyngdoh, General Secretary Wanshwa Suting, Vice President bah Ency Shadap, Finance Secretary bah Training Phawa, Publicity & information Secretary bah Mebanteilang Sukhlaiñ, President Sumer Circle Sakilan Chyrmang bad kiwei kiwei ki nongialam bad dkhot ki Unit Circle ka JNC, bad la pynphuh pynphieng ruh iaka program daka jingshad ki samla kynthei ka Shnong Jalaphet.

U President rangbah ka JNC bah Sambormi Lyngdoh haba pynskhem iaki nongkitkam ba thymmai u la ong ba nakane ka thaiñ lah pynmih ia uwei u riewkhraw bad pawkhmat ka jylla u Prof. Barrister Pakem uba dei u Vice Chancellor ba Nyngkong duh na Khasi bad Jaiñtia haka skulbah NEHU, bad u long ruh u nongialam ba hakhmat duh Jong “ka seng Ki dak thoh Jaiñtia” haki snem 1975. U bah Sambormi ula kren bynniaw ruh iaka jinglyndet ka sorkar iaka ktien Jaiñtia haka State Anthem kaba lah pynmih dang shen, ka sorkar ka pynsahnam iaka rilum Garo bad Khasi tangba iaka Jaiñtia pat ka leh klet, imat ka sorkar ka kwah ban pynduh jait noh iaka Ri lum Jaiñtia. Ula ong ruh ba mynta ka sorkar kalah nang iaid shakhmat ban pyntreikam shait shait iaka CAA bad kum ka jaidbynriew rit paid ngi dei ban don ka jingieid iwei ia iwei bad don ruh ka jingiatylli, long katba long ngin ieng skhem haka nongrim ban iada iala ka Ri bad ka Jaidbynriew.