Pynskhem u kyrtong MDC ka NPP na Narpuh ban trei na ka bynta ka roi ka par jong ki paidbah

Syllad | The Rising MeghalayaDecember 24, 2024

U kyrtong ka National People’s Party (NPP) na ka 28-Narpuh Constituency kaba hapoh Jaintia Hills Autonomous District Council (JHADC) u Daiapherbha Lamare u la pynpaw ia ka jingthmu bad ka thong kaba shai kdar ban trei na ka bynta ka bha ka miat jong ki paidbah, ban iada ia ki hok jong ki, ban pynneh pynsah ia ka kolshor bad ban kyntiew ia ka roi ka par lada un ioh ia ka jingjop ha kane ka elekshon MDC ka ban wan.

“Ka thong kaba hakhmat eh ka long ban iada ia ka khyndew ka shyiap bad ka kolshor ki briew jong ngi bad ruh ban bteng ban pynim bad pynkhlain ia ka jingtreikam jong ka Sixth Schedule kaba long ka nongiada ba kongsan halor ki hok bad ka jinglong trai ha ka imlang ka sahlang jong ngi,” ong u Bah Daiapherbha.

U la kular ruh ban pyrshang katba lah ban pynlong ain ia ka Jaintia Hills Autonomous (Village and Town Development Council) Bill 2023, bad ban ioh ia ka jingmynjur na u Lat ka Jylla Meghalaya. Kane ka sienjam kan pynlah ban pynurlong ia ka jingbei tyngka kaba beit beit (direct funding) sha ka District Council bad ka ban aijingmyntoi beit beit sha ki paidbah bad ki shnong ki thaw.

“Yn pynsuk ia ka rukom siew khajna da kaba pynrung ia ka rukom siew digital. Ia ka khajna kaba heh tam kaba long T.2,500 yn pynkylla bad pynkiew katkum ka jingkylla ha ka jinglong jingman jong ki briew bad ki kam ki jam khnang ban pynthikna ia ka jinglong khuid suba bad ka jingpynmih khajna kaba kham bha,” u la bynrap.

Da ka jingdon jong ki khyndai tylli ki Cement plant hapoh ka District, ka long kaba kongsan ba ka Jaintia Hills Autonomous District Council (JHADC) kan ioh ia ka bhah kaba biang na ka khajna. Ka jingnoh synniang kaba T.1/- shi byrni ka dewbilat kan aijingmyntoi ia ka JHADC ka ban iarap ban pynthikna halor ka jingsiew tulop biang por sha ki nongtrei ka JHADC, bad kane kan pynmih haduh kumba T.6-7 klur shi bnai bad ka ban weng ia ki jingeh ha ka liang ka pisa tyngka.

Une u kyrtong u la kular ruh halor ki kam pynroi na ka bynta ki nongshong shnong jong ka Narpuh Constituency da kaba noh synniang ruh 50% na ka tulop jong u na ka bynta ban seng ia ka Youth Development Centre.

U la pynpaw ruh halor ka jingdonkam ban buh ia ki center ha ryngkat ki nongai jinghikai kiba tbit ban pynkhreh ia ki samla na ka bynta ki competitige exam, kum ka UPSC, MPSC, SSC, DSC bad Bank PO, Bank clerical bad kiwei kiwei. Ban buh ia ki jaka aijinghikai na ka bynta ki riew donsap kum ha ki kam mechanic, computer literacy, plumbing, embroidery, Beutician bad kiba bun kiwei pat shibynta ban pynkup bor ia ki samla khlem kam khlem jam.

Kumjuh u la pynpaw ruh ia ka thong ban aijinghikai ha ka liang ka sengkam seng jam bad ban btin lynti kumno ban ioh ia ki skhim kum ka CM-Elevate, Prime Hub bad kiwei kiwei pat ki sienjam lyngba ki jingkyrshan pisa ia ki project jong ki.

Nalor kata u kyrtong ka NPP u la kular ruh halor ki lad jingkyrshan ia ki paid nongrep namar haduh kumba 70% na ka constituency ki dei kiba im da ka rep ka riang da kaba pyntreikam ia ki project bapher bapher ban kyntiew ia ka rep ka riang bad ia ka kamai kajih jong ki nongrep.

Shuh shuh u la kular ruh ba lada un poi sha ka thong un shim ia ki sienjam ban kyntiew ia ka kam jngohkai ha ki shnong kiba don ia ki lad kaba khraw kum ka shnong Sakhri, Lumtongseng, Sonapyrdi, Shymplong, Kuliang bad Borsora. U la ong ba ka jingkyntiew ia kine ki thain sha ki jaka jngohkai kan aijingmyntoi shibun ia ki nongshong shnong ha ka liang ka ioh ka kot bad kiba bun ki nongshong shnong kin ioh ia ki jingmyntoi ha kiba bun rukom.

Kane ka jingiohi jngai ka phaikhmat ban pynkupbor ia ki nongshong shnong ka Narpuh constituency lyngba ka roi ka par kaba neh, ka jingpynneh ia ka kolshor bad ka ioh ka kot, bad na ka liang une u kyrtong u la kular ban trei shitom na ka bynta ka jingbit jingbiang jong ka imlang sahlang bad ban pynthikna ia ka lawei kaba phyrnai na ka bynta baroh.