Pynsngewthuh ka RC Eve Secondary School halor ka jingdokam ka jingnang jingstad, wan phai biang ki khynnah OoSC sha ki skul

Syllad | The Rising MeghalayaSeptember 11, 2024

Ka RC Eve Secondary School Mihmyntdu kum kawei na ki shlem aijinghikai ia kiba bun ki khynnah kiba wan na ka longiing ba duna ka ïoh ka kot haka 10 tarik Nailur kala rakhe iaka World Literacy Day.

Iaka World Literacy Day ne ka sngi kyrpang ka thoh ka pule. Man la u snem haka 8 tarik Nailur kaba la pynbna da ka UNESCO, la rakhe ia kane ka sngi ha satlak ka pyrthei ban ialap iaka jingdonkam ka jingnang jingstad bad ka hok longbriew man briew bad ka imlang ka sahlang kaba nang thoh nang pule bad kaba lah ban neh.

Kumta ruh ka RC Eve Secondary School, Mihmyntdu ban rakhe kane ka sngi kyrpang kala pynlong iaka prokram kyrpang ban pynsngewthuh iaki khynnah halor ka jingkordor bad donkam ka jingnang jingstad ha kane kajuk mynta.

Ïaka jingialang ka pynïaid da ka Jessica Biam, Headteacher RC.Eve Secondary School, Mihmyntdu haka jingdonlang ka Kong D Lathong, BMC-SSA Laskein kum ka kongsan nalor ki dkhot ka School Managing Committee kiba kynthup ia u Rev. Fr. Hilarius Lamare, Fedrick Synnah, Sister Pushpa Beck, Sr. Shella Principal Don Bosco School Mihmyntdu, ki nonghikai bad kiwei kiwei.

U Phadar Hilarius Lamare ula ai ki kyntien kyrkhu kyrdoh bad kyntu kynpham iaki khynnah, u Ma Fedrick Synnah dkhot SMC ula batai shaphang ka jingkordor jong ka pule puthi bad ka jingnang jingstad. Katba ka Kong Baiahunlang Phawa, Assistant Teacher RC Eve Secondary School Mihmyntdu kala batai halor ka phang ‘Promoting Multilingual Education-Literacy for Mutual Understanding & Peace’ ne ban pynshlur iaka jinghikai ba bunjait ki ktien ban nang thoh nang tar nang pule ban wanrah iak jingsngewthuh jingmut bad ka jingsuk.

Ka Kong Manchaki Laloo, Teacher In-charge OOSC Special Training Centre RC Eve Mihmyntdu kala iathuh iaka rukom treikam jong ka Centre naduh u snem 2013 haka jingpynïaid ka Kong (L) Tina Lakiang.

Kumba ju long na ki snem sha ki snem ha une u snem ruh da ka jingtrei shitom ki Volunteer kane ka Special Training Centre napdeng ki 70 ngut ki OoSC kumba 12 ngut ki khynnah ki la rung biang sha ki school ban bteng iaka jingpule

Ka Kong D Lathong, BMC-SSA, Laskein Block kum ka kongsan ka pynpaw ka jingkmen ban don bynta lang ha kane ka prokram ryngkat bad ki khynnah bad ka dap da ka jingsngewburom iaki nongpynïaid jong ka RC Eve Secondary School, Mihmyntdu.

Ka Kong Lathong kala ong ka juk mynta ka dawa bha ban don iaka jingnang jingstad namar ka jingnang jingstad bad ka pule puthi ki long ka wait shaka lawei ba phyrnai.

Shuh shuh kala ong ruh ba ka UNESCO kumjuh ka Sorkar India haka thong jong ka World Literacy Day kila ialeh ban thaw shibun ki lad ki lynti ban kyntiew iaka pule puthi kaba long salonsar ia baroh ki khynnah.

La pynphuh iaka jingialang da ki jingrwai jingshad, ka jingpule poitri bad jingiakop dro dur ba la shim bynta da ki khynnah kane ka skul.