Pynsngewthuh ka tnad Pulit Khliehriat halor u drok, kam thombor ïaki kynthei khynnah bad ka jingshngain ha surok

Syllad | The Rising MeghalayaMay 19, 2022

Ka ophis u Superintendent of Police, East Jaintia Hills District ryngkat ka jingïatreilang ka Jaintia Eastern College, Khliehriat haka sngi Palei kila pynlong ka jingïalang pynsngewthuh paidbah halor ka jingdih drok, ki kam thombor ïaki kynthei khynnah bad halor ka jingshngain ha surok.

Ïaka jingïalang pynsngewthuh paidbah la pynlong ha Jaintia Eastern College haka jingdonlang u Ma Kyrmen Shylla Myntri ka tnad Social Welfare and Revenue ka sorkar Jylla kum u kongsan, u Deputy Commissioner ka East Jaintia u Abhilash Baranwal, IAS, Superintendent of Police East Jaintia Jagpal Singh Dhanoa, IPS, Principal ka Jaintia Eastern College u Dr. Phervision Nongtdu nalor kiwei kiwei.

Ka Kong D Shabong, Sub Inspector Khliehriat Women’s Police Station kala batai shaphang ka aiñ Protection of Children from Sexual Offences (POCSO). Ka la ong kane ka aiñ ka ïada ïa baroh ki khynnah kynthei bad shynrang ba hapoh 18 snem rta na ka jingshah lehbeiñ kum ka jingleh khlem akor, leh beijot bad kiwei kiwei ki kam kiba ïadei bad ka met ka phad jong ki bad ki kyndon ban pynshitom ïaki nonglehkam sniew.

U Bah J. Mairom MPS, Dy SO (Hq), Khliehriat ula batai kumno ban long kiba phikir haba ñiah kali ha surok ban shngain ka leit ka wan (Road Safety). Ula ong ki jingjia aksiden ki jia beit la jan man ka por bad haba wad ïaka daw la lap ba bun na kitei ki jingjia aksiden kadei tang namar ka jingkhlem akor ki nongñiah, kaba ñiah kali buaid, kaba pyndon mobile lem bad kiwei kiwei.

 “Ka jingñiah kali thurmur, ka la wanrah ïaka jingduh noh ïaka mynsiem ba kordor, ïa kaba ym tang ki nongñiah, hynrei wat ïaki nongleit nangwan ruh kumjuh” ong u Bah Mairom.

Ula ïathuh kumba ka long mynta ha East Jaintia Hills District la don palat 50 tylli ki jingjia aksident tang ha u snem 2021-22. Tang ha u snem 2021 haduh 21 ngut ki mynsiem briew ki la duh na ka jingjia aksident. Mynta u snem pat haduh kane ka kynti la don 10 ngut ki mynsiem ki la duh na ka jingjia aksident bad bun ngut ki la mynsaw.

U Banraplang Jyrwa MPS, Addl. SP Khliehriat ula batai ïaki jingeh ba mih na u drugs naduh na ïing haduh ha ka imlang ka sahlang. Ula ong ba u drok u la wanrah ïaki kam sniew ba laiphew jait bad kiba shyrkhei khamtam ka jingïoh ban bsuh khlieh haki samla ba dang lung ka rta bad ki shlur ban leh ki kam beaiñ bapher bapher”.

U Kyrmen Shylla haka jingkren ula kyntu ïaki khynnah ban shimkhia bad pynleit jingmut ïaki jingbatai ba ki ïoh khnang ban tei ïalade shimet bad ïaka imlang sahlang. Ula kyntu ban kiar na u drok bad ban pynleit jingmut tang haki kam ba bha ki ban jop haka jingim.

Kiwei kiwei kiba ai jingkren ki kynthup ia u Deputy Commissioner ka East Jaintia u Abhilash Baranwal, IAS, Superintendent of Police East Jaintia Jagpal Singh Dhanoa, IPS, Principal ka Jaintia Eastern College u Dr. Phervision Nongtdu nalor kiwei kiwei.