Pynsting ka sorkar Jylla ïaka jingkit ka JHADC, pyllait pisa T.26 Klur

Syllad | The Rising MeghalayaNovember 25, 2019

JOWAI: Ka Sorkar Jylla kala kham pynsting ïaka jingkit jong ka Jaiñtia Hills Autonomous District Council (JHADC) hadien ba kala pyllait pisa naka bhah kaba ïohlum naka khajna mar pohkhyndew kaba la kot T.26 Klur.

U Chief Executive Member (CEM) jong ka JHADC, Ma Thombor Shiwat uba bat halade ïaka pla tyngka jong ka konsil ula ong “Ka Sorkar Jylla kala pyllait ïaka bhah jong ka naka khajna mar pohkhyndew haduh T.26 Klur. Kane ka jingpyllait jong ka sorkar jylla ïa kane ka pisa kala pynsting ïaka jingkit jong ka JHADC khnang ba kan ïoh siew iaka tulop jong ki nongtrei kaba la sah la bun bun bnai.”

“Da kane pisa yn siew ïaka tulop jong ki nongtrei ka konsil haduh 3 bnai kaba kynthup ïa u bnai Jylliew, Naitung bad Nailar,” ula ong u CEM ma Thombor Shiwat.

U CEM ula pyshai ruh ïaka jingkynnoh jong ki MDC ka Bharatiya Janata Party (BJP) baka Executive Committee kaba u ialam kala pyndonkam bakla ïaka pisa jong ka skim Special Assistance Grant (SAG) jong ka sorkar kmie haduh T.16.50 Klur ha kaban siew tulop bad pension jong ki nongtrei ka JHADC.

Also Read: Kynnoh ka BJP ba pynïaidkam bakla ïaka pisa T.16 klur tam ha JHADC

“Kane ka jingkynnoh jong ki MDC jong ka BJP kalong kaba ym don nongrim bad ïa kane ka pisa naka skim SAG ngim lah ban pyndonkam klumar namar ba ngi hap ban bud thik thik ïaka kyndon ban pyniaid shakhmat ïa kane ka skim khnang ban poi hok ki kam pynroi sha u paidbah,” la ong u Ma Thombor Shiwat.