Pynthikna ka Kong Ampareen ban iakren bad ki Dy.CM ba shah khrong khajna ki kali kit mar rep

Syllad | The Rising MeghalayaJuly 23, 2024

Ka Myntri ka tnad ka Rep ka riang ka sorkar Jylla ka Kong Ampareen Lyngdoh ha ka 22 tarik Naitung ka la pynthikna ban iakren bad baroh ki arngut ki Symbud Myntri Rangbah ka Jylla halor ka mat kaba iadei bad ka jingsiew khajna jong ki kali kit mar rep hapoh ki jaka lum khajna ne Weigh Bridge ha ka Jylla.

Hadien ka jingiakynduh ia ka kynhun ki nongialam jong ka seng Federation of Khasi Jaintia and Garo People (FKJGP), ka Kong Ampareen ka la ong, “Ngim don satia ia ka bor, lada ki don kiba kum kine ki jingkynnoh, ki dei ban iaid katkum ka lynti kaba dei, ka Myntri kan hap ban sngap halor kaei kaba biang tam ka ban pynmyntoi ia baroh ki nongkhaii bad ki nongrep.”

Nalor kata ka la ong ruh, “Phim lah ban sngap tang ia kawei ka liang, baroh kin ioh ia ka lad bad ym dei ban klet ba ngi don ruh ki District Council, kaba don bynta halor kane ka kam. Ka sorkar kan ym lah ban shu shim ia ka rai halor kane ka kam khlem ka jingiasyllok kaba bniah.”

“Nga la kular sha ki ban pynlong ia ka jingiakren. Ailad ba ngan tip kham bniah shaphang kane ka kam.Ngam don jingtip satia ia kiei kiba la jia, Nga dang sdang ban sngewthuh dang mynta, hynrei nga donkam ia ka jingshai bad ngan sa shong bad baroh arngut ki Symbud Myntri Rangbah ba kin btin lynti lang halor kane ka kam,” ka la ong.

Kham hashwa kane, na ka liang u President ka FKJGP u Bah Dundee C Khongsit ula ong ba ka kynhun kala kyntu ia ka Myntri ba kan tuklar lang da kaba iakren bad ka Sorkar Jylla ba kan pyllait noh ia ki kali kit mar rep na ka jingshah lum khajna ha ki weigh bridge, bad kyntu ruh ia ka sorkar ba kan pyntreikam noh da ka Road Delivery Challan.

Katkum ka jingpynpaw ka jong u la ong ba kane ka rukom lum khajna kumba ka long mynta kam dei satia kaba la buh beit ryntih ia ka dor, kumta kane ka long kaba beain bad kam dei hi ruh ka khajna hynrei ka jinglute namar hateng la ju lum haduh T.1000 haduh T.1500 bad hateng tang T.300.