Pynthikna ka Sorkar halor ki 4 tylli ki project surok ha Mawphlang constituency

Syllad | The Rising MeghalayaAugust 30, 2024

U Symbud Myntri Rangbah ka Jylla u ba khmih ia ka Tnad PWD (Roads) u Bah Prestone Tynsong haka 29 tarik Nailar u la pyntip ba ki don sawtylli ki project surok kiba la pynkhreh ban pyntrei noh shen hapoh Mawphlang constituency.

Haba jubab ia ka jingkylli ba la wanrah da u MLA ka Mawphlang u Matthew B Kurbah hapoh ka Iingdorbar, u Bah Prestone u la ong ba na kine, artylli ki project ki dei na ka PMGSY bad artylli na ki skhim ka sorkar Jylla.

Kine ki kynthup ia ka Thain Thynroh sha Umsawmat sha Lyngdoh Phanblang bad sha  Mawngap Mawkharshiing (PMGSY-III), ka jingshna pynbhaia ka surok Mawphlang Cart Road bad Mawphlang Balat Road (Wah Umpamtiah sha Weiloi) nalor ka jingpynbha bad ka jingshna ia ka surok ban leit sha ‘Law Kyntang (Sacred Groves Mawphlang).

Ka jingmang pisa da ka Sorkar Pdeng bad ka Sorkar Jylla yn sa pyllait ha ka snem mangtyngka jong une u snem 2024-25, u la bynrap.

Na ka liang u MLA ka thain ruh u la pynpaw ka jingsngewkhia halor ka jingsniew palat ki surok ha ki thain nongkyndong kaba la ktah jur ia ki nongrep namar ka jingbym lah ban pynpoi ia ki mar rep jong ki sha ki iew ki hat. U la ai jingmut ruh ia ka sorkar ba kan wad pisa na ka bynta ban shna ia ki surok ha ki thain nongkyndong.

Ha kaba iadei bad ka jingkwah jong u MLA ban tip la ka Tnad ka don ne em ia ka jingthmu ban pynheh ia ka surok namar ka jingkhapngiah ka surok Mawngap, u Bah Prestone u la ong ba ka Tnad ka la dep ban rai ban pynkylla ia ka surok Mawngap-Mawphlang haduh surok Weiloi sha ka intermediate.

“Watla katta, ka jingkylli hangne ka long hato la ngin ioh jaka ne em namar ha kaba iadei bad ka skhim ka Sorkar Jylla kam don satia ka kyndon kaba iadei bad ka jingsiew bai jaka. Ka jingeh jong ka Tnad PWD ka dei halor ki trai jaka haba ngi kwah ban pynheh ia ka surok,” u la ong.