Pynthikna ka UDP ban ai ka jingkyrshan ia ka sorkar MDA haduh kaba kut ka samoi

Syllad | The Rising MeghalayaJuly 9, 2024

U President ka United Democratic Party (UDP) u Bah Metbah Lyngdoh ha ka 8 tarik Naitung, u la ong ba ka party jong u kan bteng ban ai ka jingkyrshan kaba pura ia ka sorkar Meghalaya Democratic Alliance ba la lamkhmat da ka National People’s Party (NPP) haduh kaba kut jong ka samoi treikam.

Haba kren sha ki lad pathai khubor, u Bah Metbah u la ong ba u sngew kyndit shibun halor ki jingmih khubor ha kaba la kynnoh ba ka party jong u kan mih noh na ka sorkar MDA.

“Hynrei, watla katta kano kano ka jingkren kaba nga ai mynta ka sngi nga la kren na ka bynta ka party bad kata ka dei kaba khatduh. Ngin iai don bad ka sorkar kumba ka long mynta bad kam shym la don satia kaba kum katei ka jingiakren hapoh ka party,” u la ong.

Nalor kata u la kyntait ruh ia ka jingkynnoh ba ka jingbym lah leh bha ha kane ka Lok Sabha elekshon kaba dang shu dep ka long namar ba ka UDP ka la iatreilang bad ka NPP. U la ong ba ha ka jingshisha ki paidbah ki kmen ia ka rukom treikam jong ka UDP hapoh ka sorkar MDA kaba la dep da kaba pynjop haduh 12 ngut ki MLA ha ka elekshon MLA 2023.

Haba kylli la ka seng VPP ka long ne em ka jingma ia ki seng riewlum ha ka jylla, u Bah Metbah u la ong, “Ngam tip, ai ba ki paidbah kin rai. Kaei kaba ka party, ka jingsngew ka jong nga bad baroh ki nongialam hapoh ka party ka long ba ngi kwah ban ioh ia ka jingjop ha kane ka elekshon MDC ka ban wan.”

“Ngam iohi satia ba ka VPP kan dei ka jingma. Kaei kaba ngam lah ban ong mynta ka long ia kaei ka daw hynrei shisien ba ngi la leit biang sha ki paidbah, ngin sa pynshai sha ki, kaei ka jingsngew artatien ba ki don” ula bynrap.

Ha kaba iadei bad ka jingdon jong ki katto katne ngut ki MDC kiba sngew syier ban iakhun ha kane ka elekshon MDC ka ban wan, u Bah Metbah u la ong, “Ngi la dei ban shim ia ka kum ka jingtynjuh lada phi dei shisha u riew ialeh.”

Ha kajuh ka por une u nongialam ka UDP u la ong ruh ba ka Regional Democratic Alliance (RDA) ka dang skhem bad kam shym la don satia kano kano ka jingiapher jingmut hapdeng ka UDP bad ka HSPDP.

Ia kane u Bah Metbah u la pynpaw halor ka jingkren ba dang shen da u working president ka UDP u Bah Paul Lyngdoh uba la pynpaw ba ka HSPDP ka lah ban mih noh na ka kynhun RDA hadien ka jingshah rem noh ha kane ka elekshon Lok Sabha kaba dang shu dep.

Halor kane ka bynta u la ong ruh ba un sa pan ka jingpynshai na u working president jong ka party, kata da kaba bynrap ruh ba kam shym la don satia kano kano ka jingiapher jingmut hapoh ka party.