Pynthikna u CM ban tehlakam ia ka jinglong jingman ba bteng ki jingjia kawang petrol bom

Syllad | The Rising MeghalayaMay 4, 2024

U Myntri Rangbah ka Jylla u Conrad K Sangma u la pynthikna ba na ka liang ka sorkar ka la shim ia baroh ki sienjam ban tehlakam ia kane ka jinglong jingman bad ban pynneh ia ka shongsuk shongsain hadien ki jingjia kawang petrol bom kiba la jia khah khah.

Haba kren sha ki lad pathai khubor haka 3 tarik Jymmang, u Conrad u la ong ruh ba kine ki kam thombor ki dei ki kam pynphai kylliang halor kaei ka kam kaba la jia bad kular skhem ba ka sorkar kan shimkhia ban tehlakam ia kiba kum kine ki jingjia bad ruh ban kem ia ki briew kiba donkti da kaba pynshong nongrim halor ki sakhi satar kiba biang.

U CM u la ong ruh, “Namar kata ngi khlem khmih lynti ba kan don ka jingpynphai kylliang, kumta ngi hap ban long shai ba kane ka dei ka jingpynphai kylliang ia kaei kaba la jia bad kumta ngim sngew lyngngoh ia kaei kaba la jia baroh.”

“Hooid kila jia khah khah hynrei ngi la tip bha bad ngi la trei khlem shongthait ban pynthikna ba kum kine ki jingjia kim dei ban jia bad na ka liang ki pulit ruh ki la shim shuh shuh ia ki sienjam ia kiba Ngam kwah ban iathuh bniah,” ong u CM.

Nalor kata u la ong ruh, “Ki bor pulit ki ladon hapdeng ka kam bad ngi sngew thikna ba yn lah ban tehlakam ia ka jinglong jingman bad Nga pynthikna sha ki paidbah jong ka sor Shillong bad ka Jylla ba ka sorkar kan leh ia kaba donkam baroh katba don la ka bor ban pynthikna ban lah ban khanglad ia kiba kum kine ki jingjia khnang ba kin ym jia shuh hadien habud.”

Haba kylli la kine ki jingjia kawang petrol bom ki don jingiadei ne em bad ka jingshah kem ki dkhot ka KSU halor ka jingjia shah pyniap jong ki nongtrei bylla ha Ichamati bad ha ka thain Mawlai Mawroh, u CM u la ong, “Kiei kiba la jia ki la wan jia hadien, hynrei kumba Nga ong ban shu pynkut bad kynnoh ia kine ki briew khlem da lah ban pynshisha ka long kaba bakla, hynrei ka sorkar ka la shim ia ki lad jingpynshitom ha ki por kiba la dep bad kan dang iai bteng ban leh ia kane ha ki por ki ban dang wan.”

Shuh shuh u Myntri u la maham tyngeh ba na ka liang ka sorkar bad ka Tnat pulit kin ym map iano iano ruh kiba leh ia ki kam bymman.