Pynthikna u Dy CM ia ka jingmynjur jong baroh kiba don bynta shwa ban pynkynriah ia ki nongdie madan

Syllad | The Rising MeghalayaJanuary 28, 2025

U Symbud Myntri Rangbah ka jylla uba khmih ia ka tnad Urban Affairs, u Bah Sniawbhalang Dhar ha ka 27 tarik Kyllalyngkot u la pynthikna ba ka sorkar kan kynthup ia baroh kiba don bynta lang ha kaba iadei bad ka jingshim rai halor ka jingpynkhreh ban pynkynriah ia ki nongshong dukan madan.

Kane ka jingpynpaw ka jong u ka la wan long ruh hadien ba ka Meghalaya & Greater Shillong Progressive Hawkers & Street Vendors Association (MGSPHSVA) ka la byrthen ban pynlong da ka jingiakhih lada ka Provisional Town Vending Committee (PTVC) ka pulom ban khot pynlong ia ka jingialang kaba kyrkieh.

Ka Synjuk jong ki nongshong dukan madan ka la dawa ruh ban weng noh mardor ia ka jingpynbna paidbah bad ban pynkut noh ia baroh ki kam kiba la leh da ka PTVC ia kaba ki la kynnoh ba ka dei ka kynhun kaba beain nalor ka jingsdang ia ki sienjam halor ki jingkam bad ki jingpyrshah bad ka jingthaw ia ka thup kyrteng jong ki nongdie madan kidei ban ioh syrnot ban shong die jingdie.

Katkum ka jingpynpaw ka jong ki, kane ka thup kyrteng jong ki nongdie madan kiba dei hok ban jied ia ki nongmihkhmat jong ki sha ka TVC namar la kren shai ha ka shithi kaba 13 tarik Nohprah 2022, ban thaw ia ka TVC kum ka kynhun ka ban pynlong ia ka jingleh sorbe bad ban khmih halor ki jingkam bad jingpyrshah bad kiwei kiwei.

Haba jubab ia ka jingkylli halor kane ka bynta, u Bah Sniawbhalang u la ong, “Ngin leh ia kiei kiei baroh katkum ki kyndon jong ka ain. Ngin pyrshang ban kynthup lang ia baroh kiba don bynta ha ka jingshim rai.”

“Hooid, lada ki don katto katne ki jyrwit jyrwat, ngin sa ia pynbeit ryngkat lang..ki lah ban don ki mat ha ki katto katne ki jaka bad na ka bynta kane ruh ngi long kiba kloi ban ia pynbeit hangne hangtai,” u la bynrap.

U la ong ruh, “Ka jingkhang jong ka sorkar barabor ka plie na ka bynta ban shong jingialang bad kiba ia don bynta lang ha kane ka kam, hynrei ka jingthmu jong ka sorkar hi ka long ba ka kwah ban pynkynriah ia ki katto katne ki jaka ba kongsan na ka bynta ka bha ka miat jong ka sor bad na ka bynta ka bit ka biang jong ki paidbah nongleit nongwan.”

“Hooid, lada ka don kano kano ka jingialeh pyrshah na ka liang ka jong ki, ngin sa pynlong ia ka jingiasyllok bad ki nongdie madan. Ngi long kiba kloi ban pdiang sngewbha ia ki ba kin iakynduh ia ngi, kam don jingeh halor kata,” u la bynrap.