Pynthikna u ma Lahkmen ban sdang noh iaka Integrated Course BEd ha Kiang Nangbah Government College

Syllad | The Rising MeghalayaMarch 3, 2023

U Ma Lahkmen Rymbui haka sngi Thohdieng ula ong ba ka sorkar Jylla kala ioh jingbit ban sdang noh iaka 4 Year Integrated Teacher Education Programmes haka kyrdan BEd mynta ka aiom ha Kiang Nangbah Government College.

U Ma Lahkmen Rymbui uba la wanphai biang kum u MLA ka Amlarem bad u myntri barim ka tnad pule puthi ula ong ba ka tnad pule puthi ka sorkar jylla kala ioh jingbit ban sdang noh iaka Integrated Course ba saw snem haka kyrdan BEd mynta hi ka aiom.

“Watla ngam shym long shuh u myntri sorkar, hynrei ka jingbuddien bad ka jingangnud jong nga ban iasaid bad ka tnad pule puthi jong ka sorkar pdeng ha ki snem kaba la dep ban pynthikna ba ka Kiang Nangbah Government College kan ioh sdang iaka Integrated Course ha ka kyrdan BEd kala urlong mynta ka aiom,” la ong u ma Lahkmen myntri barim ka tnad pule puthi ka sorkar jylla.

Kane ka Integrated Course kan plie lad iaki samla pule kiba kwah pule BEd ban long ki nonghikai bad kane ka kyrdan kan kynthup lang iaka BA & BEd, BSc & BEd lane BEd BCom ha juh ka por.

U Ma Lahkmen ula iathuh ba ka National Council for Teacher Education (NCTE) kaba hap hapoh ka Ministry of Education kala ai jingbit iaka Kiang Nangbah ban sdang noh ia kane ka Integrated Course ba saw snem ban wanrah iaka jingkylla curriculum ne program ai jinghikai ban ban iarap ia kiba angnud ban long ki nonghikai ban sam iaka jingnang jingstad katkum ka curriculum kaba thymmai ne policy thymmai jong ka NEP.