Pynthikna u Myntri ban bishar bniah ban pynkiew tulop ia ki 1200 ngut ki nongtrei SSA

Syllad | The Rising MeghalayaJune 26, 2024

U Myntri ka Tnad Pule Puthi u Rakkam A Sangma ha ka 25 Jylliew, u la pyntip ba la phah ia ka jingtyrwa sha ka Tnat Pla Tyngka na ka bynta ban mynjur ban pynkiew ia ka tulop na ka bynta kumba 1200 ngut ki nongtrei ka SSA ne ki Non teaching staff.

Haba kren sha ki lad pathai khubor, u Myntri u la ong ba ki nongmihkhmat na ka kynhun jong ka All Meghalaya SSA Non-Teaching Staff Association (AMSSANTSA) ki la wan iakynduh ia u ban iakren ha kaba iadei bad kane ka phang.

“Ha ka jingshisha na ka liang ka Tnat ka la dep ban phah ia ka jingtyrwa bad ka file ka la don bad ka Tnat Pla Tyngka bad ki kam ki la iaid shakhmat bad ngi dang ap mynta ba kin pyndep,” u la ong.

“Na ka liang u Myntri Rangbah ka Jylla ruh u tip bha halor ka jingiaid jong ka kam bad ngin sa leh ia kaba donkam baroh. Ngi khmih lynti ba ka Tnat Pla tyngka kan sa shim ia ka rai kaba donkam,” u la bynrap.

Na ka liang u Rakkam u la ong ba ka Tnat Pla tyngka kan sa shim ia ka rai kaba khatduh da kaba pynshong nongrim halor ka jingdon pisa jong ka jylla.

U Myntri u la ong ruh sha kane ka kynhun ki nongmihkhmat ba ki jingpynlong jingiakhih kim dei satia ki lynti ka ban lah ban pynbeit ne weng ia ki jingeh.

Nalor kata u pyntip ruh ba ki nongialam ka kynhun ki la kular ba kin ym iaid shahkhmat ban pynlong ia ki jingiakhih kumba la thmu namar na ka liang ka sorkar ka la dep ban shimkhia ha kaba iadei bad kane ka kam.

Katkum ka jingpynpaw ka jong u, u la ong ba ka jingpynkiew tulop khatduh eh ka dei kaba la leh naduh u snem 2016.