Pynthikna u Myntri ban iakren bad ka MHA ba thmu pynkhie im biang ki kynhun kieng atiar

Syllad | The Rising MeghalayaFebruary 23, 2025

U Myntri khynnah ka Sorkar Pdeng uba khmih ia Tnad External Affairs & Textiles u Pabitra Margherita u la ong ba un sa rah ban iakren bad ka Ministry of Home Affairs (MHA) halor ki jingmih ki khubor kiba kynnoh ba ka don ka jingpyrshang pynkhie im biang ia ki kynhun kieng atiar kiba don ha khappud ka India bad Bangladesh.

Haba kren sha ki lad pathai khubor, u Margherita u la ong ba lada ki don shisha kiba kum kine ki jingtip, un shimkhia ia kane ban iakren bad ka Tnad kam Pohiing.

“Ngi pynthikna ba ka jingshngain ka jong ngi bad ka jingiada ka dei barabor kaba hakhmat eh jong ka ri,” ong u Margherita.

Halor ka jingdawa ban buh ia ka Passport Office ha Tura, West Garo Hills, une u Myntri Khynnah ka sorkar Pdeng u la ong ba haduh mynta na ka liang ka Tnad kam pat shym la ioh pdiang satia ia kano kano ka jingkyrpad na ka sorkar Jylla ha kaba iadei bad kane ka phang.”

“Kumta lada ka don kaba kum kane ka jingkyrpad na ka liang ka sorkar Jylla, khlem artatien ka Ministry kan iamir jingmut halor kane. Ka Ministry ka trei shitom ban pynpoi ia ki lad jingshakri sha baroh ki jaka bad wat sha kito kiba pajih bad kyndong tam jong ka ri. Khlem artatien lada ka don kaba kum kane ka jingtyrwa na ka liang ka sorkar Jylla ne na kiba don bynta ha kane ka kam, ngin sa iamir jingmut bad ngi ngeit skhem ba kan don kaei kaei kaba kum kata,” u la bynrap.