Pynthikna u Myntri ban pynioh bording sha baroh ki shnong kiba dang shongdum hapoh u 2028

Syllad | The Rising MeghalayaJune 25, 2024

U Myntri ka Tnat Bording u Abu Taher Mondal ha ka 24 tarik Jylliew ula pyntip ba ka Tnat Meghalaya Energy Corporation Limited (MeECL) shen kan pynlong ka jingwad bniah ha baroh kawei ka jylla khnang bad pynthikna ba baroh ki shnong kiba dang shongdum kin sa ioh ia ka bording ilektrik hapoh jong u snem 2028.

Ia kane u Myntri u la pynpaw sha ki lad pathai khubor hadien ka jingialang bad ka kynhun ki nongmihkhmat ba la ialam da u nongthaw ain ka seng Congress na Mawhati u Bah Charles Marngar, uba la kyrpad ia ka jingtuklar lem halor ka bym thikna ka rukom sam bording sha kiba buntylli ki shnong bad halor ka jingdon jong ki shnong kiba hap hapoh ka constituency jong u ki bym pat ioh satia ia ka lain bording.

U Mondal u la ong ba u la pynthikna sha kane ka kynhun ba shen ka Tnat kan pyrshang katba lah ban weng ia kine ki jingeh kiba kine ki shnong ki iakynduh kumjuh ban pynioh bording sha kito ki shnong kiba dang shongdum, kata da kaba pynpaw ruh ba kane ka dei ka thong jong ka sorkar MDA ban pynpoi bording sha baroh ki shnong kiba don hapoh ka Jylla.

“Kine ki jingeh ki la wan long namar ki don bun bah ki shnong kiba dang shu mih thymmai lane ka jingnangheh nangiar jong ki shnong ki thaw, kumta kine ki dei ki mat kiba iai bteng bad kam dei satia ba ka dei ka kam kaba sahteng la slem bah. Watla ka shnong ka la ioh bording hynrei namar ka jingnang heh nangiar jong ka shnong kumta ruh ka donkam ia ka bording na ka bynta kito ki longiing kiba dang shu mih thymmai. Kumta ngi la shimkhia ruh halor kane ka mat kumjuh khnang ba kan ym don kawei ruh ka longiing ka ban shah iehnoh,” ong u Myntri.

Kham hashwa na ka liang u Bah Charles Marngar u la ong ruh ba u la dep ban aijingtip sha u Myntri halor ka jingeh kaba kum ki nongshong shnong ki iakynduh hapoh ka thain Mawhati area, Sonidar, Umtrai bad Umsiang area namar ka jingbym biang ka rukom pynioh ia ka bording ilektrik.